Մենք ճուտո էինք ասում բանակում չծառայածներին, Նիկոլն ո՞ւմ է ծաղրում

Thu, 30 Jul 2026 16:15:56 +0400

Հայաստանի տղաները մի ժամանակ արծիվ էին։ Նրանք պատերազմներ են հաղթել, երկիր են կառուցել, իրենց ուժով ու նվիրումով անցել են ամենադժվար ճանապարհները։ Նրանք ապացուցել են, որ տղամարդ լինելը միայն խոսք չէ, այլ պատասխանատվություն, պայքար և գործ։
Այսօր, սակայն, ցավով ենք լսում խոսքեր, որոնք հնչում են երկրի ղեկավարի կողմից։ Կառավարության նիստում Նիկոլ Փաշինյանն ասում է․ «Հայաստանում, որ սոցիալական հարցում անցկացնենք, կարող է պարզվի, որ Հայաստանի տղաների, ենթադրենք, մի X տոկոսը ճուտ է, Ճուտո է։ Մենք հարց չենք տալիս՝ որտեղից է սա, մենք կիրակի օրերի ամենալավ ժամին դա ցույց ենք տալիս»։
Այս խոսքերը բազմաթիվ հարցեր են առաջացնում․ եթե այսօր հասարակության մեջ կան նման խնդիրներ, ապա որտեղի՞ց են դրանք առաջացել։ Ո՞վ է պատասխանատու այն միջավայրի համար, որտեղ երիտասարդը կարող է կորցնել իր արժեքները, նպատակներն ու պատասխանատվության զգացումը։
Խնդիրները չեն լուծվում մարդկանց պիտակավորելով։ Եթե կան թերություններ, պետք է հասկանալ դրանց պատճառները և փորձել փոխել իրավիճակը։ Պետության և հասարակության նպատակը պետք է լինի երիտասարդին ուժեղացնելը, կրթելը և ոգեշնչելը, ոչ թե նրան նվաստացնող բնորոշումներ տալը։
Հայաստանի տղաների պատմությունը միայն ներկա պահի մասին չէ։ Այն գրված է նրանց արյամբ, աշխատանքով և նվիրումով, ովքեր տարբեր ժամանակներում կանգնել են երկրի կողքին։ Այդ ժառանգությունը արժանի է ոչ թե ծաղրանքի կամ վիրավորանքի, այլ հարգանքի և շարունակության։ Այդ ժառանգությունը պետք է հարգել և փոխանցել նոր սերունդներին։
Ի վերջո, մինչև Փաշինյանի իշխանության գալը մենք ճուտո էինք ասում բանակում չծառայածներին։ Հիմա հարց է առաջանում՝ Նիկոլ Փաշինյանն այդ բառով ո՞ւմ է նկատի ունենում, ու՞մ է ծաղրում։