Բաքուն պնդում է՝ իրենք են ստիպել Իսրայելին չճանաչել Հայոց ցեղասպանությունը

Wed, 05 Aug 2026 18:00:29 +0400

Ադրբեջանի նախագահի օգնական Հիքմեթ Հաջիևը թուրք լրագրողների խմբին պատմել է, թե ինչպես է Բաքուն հաջողությամբ համոզել Իսրայելին հրաժարվել Հայոց ցեղասպանությունը ճանաչելու մտադրությունից, որը, նրա պնդմամբ, ուղղված էր Թուրքիային գրգռելուն։

Ըստ Հաջիևի, Ադրբեջանը այս հարցը դիտարկել է որպես սկզբունքային հարց և գործել է առանց Անկարայի հետ նախնական խորհրդակցության։

«Մինչ մենք Անկարայի հետ խորհրդակցում ենք բազմաթիվ հարցերի շուրջ, այս դեպքում մենք քայլ ենք կատարել առանց Թուրքիայի հետ նախնական քննարկման։ Սա պահանջում է «մեկ ազգ, երկու պետություն» սկզբունքը։ Մենք Իսրայելին ասել ենք. «Դուք սխալ եք անում։ Եթե կարծում եք, որ կարող եք այս քայլով վնասել Թուրքիային, սխալվում եք», – Հիքմեթ Հաջիևի խոսքերն է մեջբերում «Միլլիեթը»։

Հաջիևը նշել է, որ ադրբեջանական կողմը զգուշացրել է Իսրայելին, որ նման որոշումը ոչ միայն չի հասնի իր հայտարարած նպատակին, այլև կվնասի Իսրայելի հարաբերություններին Թուրքիայի հետ և կարող է բացասաբար անդրադառնալ Ադրբեջանի հետ հարաբերությունների և ադրբեջանական հանրության կողմից Իսրայելի ընկալման վրա։

«Մենք բացատրեցինք, որ սա Իսրայելին որևէ օգուտ չի բերի և խորհուրդ տվեցինք հրաժարվել այդ մտքից։ Նրանք ընդունեցին, որ դա սխալ որոշում է և հասկացան այն հնարավորինս շուտ չեղարկելու կարևորությունը»։

Նախագահի օգնականի խոսքով՝ Ադրբեջանը երախտագիտություն չի ակնկալում այս գործողությունների համար․ «Սա մեր պարտականությունն է։ Մենք երախտագիտություն չենք ակնկալում սրա համար՝ սա մեր եղբայրական պարտականությունն է»։

Հաջիևը նաև նշել է, որ Թուրքիայի շահերը Ադրբեջանի համար բացարձակ առաջնահերթություն են։

«Երբ խոսքը վերաբերում է Թուրքիային, սա մեզ համար բանակցությունների առարկա չէ։ Եթե առաջանա որևէ հարց, որը կարող է վնասել Թուրքիայի շահերին, անկախ նրանից, թե ով է այն նախաձեռնում, Ադրբեջանը սկզբունքային դիրքորոշում է ընդունում»։

Հիշեցնենք, որ շաբաթներ առաջ Իսրայելի ԱԳ նախարարը կառավարությանը ներկայացրել էր հայոց ցեղասպանությունը ճանաչող բանաձև, որն ընդունվել է միաձայն։ Քնեսեթում դրա ընդունումը հետաձգվել էր, իսկ մինչև այդ երկրի վարչապետ Բենիամին Նեթանյահուն խոստովանել էր, որ աջակցում է բանաձևի ընդունմանը։