Բաքվից Արման Եղոյանին հորդորում են ժանգլյորությամբ չզբաղվել

Thu, 13 Aug 2026 13:40:44 +0400

Նույնիսկ Ադրբեջանում են սկսել նյարդայնանալ «Քաղաքացիական պայմանագրի» ներկայացուցիչների՝ Զանգեզուրի միջանցքի հետ կապված տարատեսակ մանիպուլյացիաներից: Մասնավորապես, Minval.az-ի հեղինակ Ակպեր Հասանովը նշում է, որ ՔՊ պատգամավոր Արման Եղոյանի արած հայտարարությունը, թե ստորագրված փաստաթղթերում Զանգեզուրի միջանցք անվանումը չկա՝ տերմինների ժանգլյորության վառ օրինակ է, որն ուղղված է, իհարկե, հայ լսարանին: Հասանովը նշում է, որ հարցն այն չէ, թե հայ-ամերիկյան փաստաթղթերում կա՞ նշված Զանգեզուրի միջանցք անվանումը, թե ոչ, այլ կարևոր այն է, թե ինչ կոնկրետ տրանսպորտային ռեժիմ պետք է կիրառվի TRIPP-ի՝ Հայաստանով անցնող հատվածում և ինչ տնտեսական գործառույթ պետք է այն կատարի:

Ադրբեջանցի հեղինակը նկատում է, որ այս պարագայում սկզբունքային տարբերություն է առաջանում քաղաքական անվանման ու ֆունկցիոնալ բովանդակության միջեւ և հիշեցնում, որ Ալիևը, խոսելով միջանցքի մասին, հայտարարել է, որ, այսպես կոչված, Զանգեզուրի միջանցքը դառնալու է Արևելք-Արևմուտք միջանցքի ճյուղերից մեկը և միևնույն ժամանակ կապված է լինելու Հյուսիս-Հարավ միջանցքի հետ: Բացի այդ, Ալիևը հայտարարել էր, որ Նախիջևանի միջով տարեկան 15 միլիոն տոննա բեռ պետք է անցնի և դա կարող է ինքիշխան հանրապետությունը վերածել տարածաշրջանի կարևորագույն տրանսպորտային հաբի:

Ակպեր Հասանովը գրում է. «Այս առումով, ուզում եմ հիշեցնել, որ Ադրբեջանի տարանցիկ տրանսպորտի խորհուրդը պաշտոնապես TRIPP-ը բնութագրում է որպես նախագիծ, որն ապահովում է uninterrupted transport connection -անխոչընդոտ տրանսպորտային կապ Ադրբեջանի եւ Նախիջևանի Ինքնավար Հանրապետության միջև։ Հստակորեն նշում է, որ Զանգեզուրի միջանցքը կդառնա Միջին և Հյուսիս-Հարավ տրանսպորտային միջանցքների նոր կարևոր հատված։ Եւ այստեղ հասնում ենք հարցի բուն էությանը։ Անունը կարելի է չնշել, բայց դրա գործառույթը հնարավոր չի չեղարկել։ Արման Էղոյանը, ըստ էության, հայ հանրությանն առաջարկում է հետևյալ տրամաբանությունը. քանի որ փաստաթղթերում չի հիշատակվում «Զանգեզուրի միջանցք» անվանումը, դա նշանակում է Զանգեզուրի միջանցք գոյություն չունի։ Սակայն սա մոտավորապես համարժեք է պնդելուն, որ եթե փաստաթղթում չի հիշատակվում «մայրուղի» բառը, ապա այնտեղ նկարագրված ճանապարհը դադարում է լինել մայրուղի։ Իրականությունն այն է, որ միջազգային քաղաքականության և տրանսպորտային դիվանագիտության մեջ նախագծի պարամետրերը, այլ ոչ թե անվանումն է շատ կարևոր:

Այնուհետև հեղինակը հիշեցնում է, որ 2026 թվականի հունվարի 14-ին ստորագրված հայ-ամերիկյան փաստաթղթերում հստակորեն նշված են մայրուղու պարամետրերը, դրանք են՝ այս պրոյեկտով պետք է ապահովվի unimpeded, multimodal transit connectivity on the territory of Armenia – անխոչընդոտ մուլտիմոդալ տրանզիտ ապահովություն Հայաստանի տարածքով, բացի այդ ուղիղ նշված է, որ TRIPP-ը միավորում է Ադրբեջանի հիմնական մասն ու Նախիջևանի Ինքնավար Հանրապետությունը և դառնում է Տրանսկասպյան առևտրային երթուղու կարևորագույն հատված: Այսինքն, հայկական փաստաթղթում երեք հստակ բան կա ֆիքսված՝ երթուղին անցնում է Հայաստանի տարածքով, միջանցքը կապում է Ադրբեջանն ու Նախիջևանը, և երրորդ ամենակարևոր ու սկզբունքային կետը՝ այն ապահովում է անխոչընդոտ անցում երթուղով…

Ադրբեջանցի հեղինակը փաստացի հիշեցնում է ՔՊ-ին, որ սեփական հանրությանն ու ընտրողներին պետք չէ ժանգլյորական հնարքներով եւ ապատեղեկատվությամբ սնել ու փորձել ցանկալին իրականության փոխարեն անցկացնել…