Կպատժե՞ն Պապիկյանի՞ն, թե ոչ
Thu, 13 Aug 2026 14:21:09 +0400
Վարչապետ Նիկոլ Փաշինյանը հայտնել է, որ զինված ուժերում զինծառայողի հերթական մահվան դեպքից հետո քննարկում է ունեցել պաշտպանության նախարար Սուրեն Պապիկյանի հետ։
Լրագրողների հետ ճեպազրույցում Փաշինյանին հարց է ուղղվել՝ արդյոք ստեղծված իրավիճակում չի պատրաստվում պատասխանատվության ենթարկել պաշտպանության նախարարին։
Վարչապետը նշել է, որ առաջիկայում համապատասխան կառույցներում կադրային փոփոխություններ են սպասվում։ Նրա խոսքով՝ փոփոխությունները վերաբերում են այն ստորաբաժանումներին, որոնք անմիջականորեն պատասխանատու են խնդրի կանխարգելման և դրա ուղղությամբ տարվող աշխատանքների համար։
Փաշինյանը հայտնել է, որ որոշումն արդեն կայացրել է։ Մասնավորապես, փոփոխություններ կլինեն Ռազմական ոստիկանությունում և բարոյահոգեբանական ապահովման վարչությունում։ Միաժամանակ, ըստ վարչապետի, մանրամասն ուսումնասիրվելու է, թե ինչու իրականացվող միջոցառումները չեն ապահովում ակնկալվող արդյունքը։
Վարչապետն ընդգծել է, որ ստեղծված իրավիճակում անհրաժեշտ է նաև անհատական պատասխանատվության մեխանիզմի կիրառում։
Միևնույն ժամանակ Փաշինյանը նշել է, որ իր գնահատմամբ՝ տվյալ խնդրի լուծման ուղղությամբ բավարար ջանքեր չգործադրելու հարցում պատասխանատվությունը չի կարող ուղղակիորեն վերագրվել Զինված ուժերի գլխավոր շտաբի պետին կամ պաշտպանության նախարարին։
Օգոստոսի 13-ին ՊՆ զորամասերից մեկում հայտնաբերվել է զինծառայող Գրիգոր Էդգարի Զաքարյանի դին։ Նախնական տեղեկություններով՝ զինծառայողը մահացել է հրազենային վնասվածքից։ Դեպքի հանգամանքները պարզելու նպատակով քննություն է իրականացվում։