«Վենեցիայի եղբայրներից» մեկի ունեցվածքը խլելու գործընթաց է սկսվել

Mon, 17 Aug 2026 13:20:36 +0400

Հակակոռուպցիոն դատարանը վարույթ է ընդունել Գլխավոր դատախազության՝ ապօրինի ծագում ունեցող գույքի բռնագանձման վերաբերյալ հերթական հայցադիմումը։

Գլխավոր դատախազության ապօրինի ծագում ունեցող գույքի բռնագանձման գործերով վարչությունը դատարանին պահանջել է Պետական եկամուտների կոմիտեի մաքսանենգության դեմ պայքարի և կրկնակի մաքսային հսկողության վարչության Գուգարքի բաժնի պետի պաշտոնը զբաղեցրած Ասատուր Սահակյանից և նրա հետ փոխկապակցված անձանցից հօգուտ Հայաստանի Հանրապետության բռնագանձել՝
Երևան քաղաքում գտնվող 2 անշարժ գույք,
4 տրանսպորտային միջոց,
4 իրավաբանական անձանցում մասնակցություն,
183 միլիոն 561 հազար դրամ՝ որպես ապօրինի դրամական միջոցների մնացորդ,
10 միլիոն 566 հազար դրամ, որը չի հիմնավորվում անձի օրինական եկամուտներով, ունի ապօրինի ծագում, փոխանցվել է բարեխիղճ ձեռքբերողի կամ հնարավոր չէ նույնականացնել և բռնագանձել։

Ասատուր Սահակյանի անունը նախկինում ևս հայտնվել է հանրային ուշադրության կենտրոնում։ 2017-ին «Էրեբունի» ընտրատարածքից ռեյտինգային կարգով խորհրդարանական ընտրություններին մասնակցելուց և չընտրվելուց հետո նա վերադարձել է ՊԵԿ-ում զբաղեցրած նախկին պաշտոնին՝ մաքսանենգության դեմ պայքարի և կրկնակի մաքսային հսկողության վարչության Գուգարքի բաժնի պետի պաշտոնին։

Սահակյանը այդ պաշտոնը զբաղեցնում էր 2008 թվականից։ 2017 թվականի փետրվարին նա ազատվել էր աշխատանքից՝ ՀՀԿ ընտրական ցուցակով թիվ 4 ընտրատարածքում (Կենտրոն, Նորք-Մարաշ, Էրեբունի, Նուբարաշեն) պատգամավորի թեկնածու առաջադրվելու նպատակով։ Ընտրությունների արդյունքում նա ստացել էր 1726 ձայն։

Ասատուր Սահակյանը և նրա եղբայրը՝ Արտյոմը, Էրեբունի վարչական շրջանում «Վենեցիա» հյուրանոցային համալիրի, ինչպես նաև Մոնումենտում գործող համանուն ռեստորանի սեփականատերերն են։