Նյու Յորքի դաշնային դատարանը չեղարկել է ԱՄՆ նախագահ Դոնալդ Թրամփի վարչակազմի՝ 75 երկրների քաղաքացիներին ներգաղթային վիզաների տրամադրման արգելքը՝ այն ճանաչելով օրենքին հակասող և ԱՄՆ պետքարտուղար Մարկո Ռուբիոյի լիազորությունների սահմանները գերազանցող քաղաքականություն։ Այս մասին հայտնել է CNN-ը։
Մանհեթենի դաշնային շրջանային դատարանի դատավոր Ջանեթ Վարգասը հայտարարել է, որ ԱՄՆ Պետդեպարտամենտը փաստացի հրահանգել էր մերժել վիզաների տրամադրումը դիմորդներին բացառապես նրանց քաղաքացիության հիման վրա, նույնիսկ այն դեպքերում, երբ նրանք կարող էին ապացուցել, որ պետական օգնության կարիք չեն ունենալու։
Հունվարին ԱՄՆ Պետդեպարտամենտը դադարեցրել էր աշխարհի երկրների մոտ 40 տոկոսի քաղաքացիների ներգաղթային վիզաների դիմումների մշակումը։ Ցուցակում էին նաև Ռուսաստանը, Բրազիլիան, Կոլումբիան, Եգիպտոսը, Հայիթին և Սոմալին։ ԱՄՆ իշխանությունները որոշումը բացատրել էին այն մարդկանց մուտքը կանխելու անհրաժեշտությամբ, որոնք կարող էին պետական սոցիալական նպաստների շահառու դառնալ։
Սակայն ԱՄՆ օրենսդրությամբ նախատեսվում է, որ այն հարցը, թե արդյոք ներգաղթյալը կարող է դառնալ այսպես կոչված «public charge»՝ պետական աջակցության պոտենցիալ կարիք ունեցող անձ, պետք է որոշվի անհատական կարգով՝ հաշվի առնելով նրա ֆինանսական վիճակը, տարիքը, առողջական վիճակը, հմտություններն ու ընտանեկան հանգամանքները։
Վարգասը նշել է, որ Ռուբիոյի՝ դիվանագիտական և հյուպատոսական ներկայացուցչություններին ուղղված հրահանգը պահանջում էր մերժել դիմորդներին նույնիսկ այն դեպքերում, երբ նրանք լրացուցիչ ապացույցներ էին ներկայացնում իրենց ֆինանսական անկախության վերաբերյալ։
Դատավորի խոսքով՝ նման ընթացակարգի պայմաններում «արդյունքը կանխորոշված է», և վիզան, միևնույն է, մերժվելու է։
Դատարանը նաև եկել է այն եզրակացության, որ այդ քաղաքականությունը խախտում է 1965 թվականի օրենքը, որն արգելում է վիզաների տրամադրման գործընթացում խտրականությունն՝ ազգային պատկանելության հիմքով։
Միևնույն ժամանակ, օրենքով նախատեսված այլ հիմքերով վիզաների մերժման վերաբերյալ որոշումները շարունակում են ուժի մեջ մնալ։
Սահմանափակումները վերաբերում էին ԱՄՆ-ում մշտական բնակության համար նախատեսված ներգաղթային վիզաներին, այդ թվում՝ ընտանիքի վերամիավորման և աշխատանքի նպատակով տրամադրվող վիզաներին։ Զբոսաշրջային և ուսանողական ոչ ներգաղթային վիզաների վրա արգելքը չէր տարածվում։
Դատավորը կողմերին մինչև սեպտեմբերի 11-ը ժամանակ է տվել՝ գործի հետագա քննության վերաբերյալ իրենց առաջարկները ներկայացնելու համար։ Թրամփի վարչակազմը կարող է բողոքարկել դատարանի որոշումը։
Source: USAArmenia
Իլոն Մասկը խոստովանել է Չինաստանի հանդեպ իր սերը Sat, 07 Nov 2026 23:45:31 +0400 Tesla-ի…
Քլոե Քարդաշյանի նախկին ամուսինը ութ օրում ավելի քան 50 հազար դոլար է վաստակել Sat, 07…
Իրանը պատրաստվում է ցուցադրել իր հրթիռների իրական հեռահարությունը Sat, 07 Nov 2026 23:23:30 +0400 Իրանը…
ԱՄՆ-ում թողարկվել է Մելանյա Թրամփի մասին ֆիլմի թրեյլերը Sat, 07 Nov 2026 23:07:56 +0400 Հոսքային…
Կմարմնավորի լեգենդար մարդասպանին Sat, 07 Nov 2026 23:00:55 +0400 Կիանու Ռիվզը պայմանավորվել է Lionsgate-ի հետ…
«Այսօր ուժեղ, խրոխտ, անկոտրում և գեղեցիկ հայուհու հայացքով դիմավորեց մեզ». Անիի ծննդյան օրն է Sat,…