TRIPP-ի շուրջ հիմնական բանակցողները Երևանն ու Վաշինգտոնն են, դա բնական է․ Բայրամով

Wed, 09 Sep 2026 13:38:23 +0400

Ադրբեջանի արտաքին գործերի նախարար Ջեյհուն Բայրամովը չի բացառել իր հայ գործընկեր Արարատ Միրզոյանի հետ նոր հանդիպումը։ Այս մասին նա ասել է ադրբեջանցի լրագրողներին։

Նախարարը նշել է, որ երկու երկրների արտաքին գործերի նախարարությունների միջև շփումները կանոնավոր են։

«Մեր վերջին հանդիպումը տեղի է ունեցել Բիշքեկում։ Հենց այդ ժամանակ էլ մենք համաձայնության ենք եկել երկկողմ հանդիպումները շարունակելու անհրաժեշտության հարցում», – ասել է Բայրամովը։

Նա ընդգծել է, որ սահմանազատման գործընթացը նույնպես կանոնավոր քննարկումների առարկա է։

Բայրամովը նաև նշել է, որ TRIPP նախագծի վերաբերյալ հիմնական բանակցությունները վարվում են ԱՄՆ-ի և Հայաստանի միջև, սակայն դրա իրականացումը անհնար է առանց Ադրբեջանի մասնակցության։

«TRIPP-ի վերաբերյալ հիմնական բանակցությունները վարվում են ԱՄՆ-ի և Հայաստանի միջև, և դա բնական է։ Միևնույն ժամանակ, մեր ամերիկացի գործընկերները պարբերաբար տեղեկացնում են ադրբեջանական կողմին, քանի որ նախագծի իրականացումը անհնար է առանց Ադրբեջանի մասնակցության», – ընդգծել է ադրբեջանցի դիվանագետը։