Կանադան պատրաստ է նորից օգնել Կիևին․ Զելենսկու արձագանքը

Fri, 11 Sep 2026 02:30:28 +0400

Օտտավան պատրաստ է միանալ FREYJA եվրոպական հակաբալիստիկ ծրագրին և Կիևին տրամադրել լրացուցիչ պաշտպանական տեխնոլոգիաներ, հայտարարել է Ուկրաինայի նախագահ Վլադիմիր Զելենսկին Կանադայի վարչապետ Մարկ Քարնիի հետ հանդիպումից հետո։

Զելենսկու խոսքով՝ սեպտեմբերի 10-ի հանդիպմանը կողմերը մանրամասն քննարկել են այս և հաջորդ տարի Ուկրաինայի ֆինանսական կայունության ապահովման հարցը, ձմեռային օգնության փաթեթը, էներգետիկան և հակաօդային պաշտպանությունը։ Ուկրաինայի նախագահը Քարնիին պատմել է նաև ռուսական բալիստիկ հրթիռների և անօդաչու թռչող սարքերի հարվածների մասին։

«Մարկը վստահեցրել է, որ Կանադան պատրաստ է միանալ մեր եվրոպական հակաբալիստիկ FREYJA ծրագրին իր տեխնոլոգիաներով։ Սա անհրաժեշտ և ժամանակին քայլ է։ Կլինեն նաև պաշտպանական արտադրանքի լրացուցիչ մատակարարումներ», – նշել է նա։

Բացի այդ, ղեկավարները քննարկել են պաշտպանության և տնտեսական ոլորտներում հեռանկարային երկկողմ նախագծերը։

«Մեր թիմերը ներկայումս աշխատում են անօդաչու թռչող սարքերի գործարքի վրա: Հուսով ենք, որ մոտ ապագայում մենք կկարողանանք լիարժեք համաձայնագիր կնքել», – հավելել է Զելենսկին: