ԱԺ Տարածքային կառավարման և շրջակա միջավայրի պահպանության հարցերի մշտական հանձնաժողովի նախագահի ընտրության քննարկման ընթացքում ընդդիմադիր պատգամավոր Հայկ Ֆարմանյանն անդրադարձել է Գյումրիում տեղակայված 102-րդ ռուսական ռազմաբազայի թեմային։

Նրա խոսքով՝ ռազմաբազայի շուրջ քննարկումներում իշխանության ներկայացուցիչների դիրքորոշումներից տպավորություն է ստեղծվում, որ նրանք ցանկանում են դրա դուրսբերումը Հայաստանից։

Ֆարմանյանը նշել է, որ ռազմաբազայում ծառայում է մոտ 5000 զինծառայող, իսկ դրա ներկայության արդյունքում Գյումրիում ստեղծվել է շուրջ 15 հազար աշխատատեղ։

Պատգամավորն անդրադարձել է նաև հնչած այն տեսակետին, ըստ որի՝ ռուսական ռազմաբազայի դուրսբերման դեպքում Հայաստանը կարող է «անտեր մնալ»։ Նրա խոսքով՝ այդ ձևակերպումը ճիշտ է, եթե իշխանությունը չի ստանձնում պատասխանատվություն հնարավոր սոցիալ-տնտեսական հետևանքների համար։

Ֆարմանյանը հատկապես ընդգծել է Շիրակի մարզում աշխատատեղերի կորստի վտանգը՝ հաշվի առնելով, որ մարզը համարվում է Հայաստանի ամենաաղքատ մարզերից մեկը։

«Եթե պատասխանատվություն չեն ստանձնում մեր իշխանությունները, որ ՀՀ ամենաաղքատ մարզում՝ Շիրակում, 15 հազար աշխատատեղի կորստի վտանգ կա, ու մեր ժողովուրդն անտեր կմնա, դա չգիտակցելը չեմ հասկանում»,- ասել է պատգամավորը։