ՔՊ-ն պետք է ամբողջությամբ արմատախիլ արվի
Wed, 16 Sep 2026 13:25:23 +0400
ԱԺ «Հայաստան» խմբակցության պատգամավոր Իշխան Սաղաթելյանը կարծում է, որ «Քաղաքացիական պայմանագիր» կուսակցությունը պետք է ամբողջությամբ հեռացվի քաղաքական դաշտից։ Այս մասին նա հայտարարել է ասուլիսի ժամանակ՝ անդրադառնալով ՔՊ-ական պատգամավոր Արման Եղոյանի՝ նախօրեին Ազգային ժողովում հնչեցրած հայտարարություններին։
Սաղաթելյանի գնահատմամբ՝ ՔՊ-ի իշխանության տարիները Հայաստանի համար ուղեկցվել են ծանր հետևանքներով։ Նրա խոսքով՝ իշխանության վարած քաղաքականության արդյունքում, իր գնահատմամբ, վնասվել են Հայաստանի տարածքային ամբողջականությունն ու ինքնիշխանությունը։
Անդրադառնալով Դաշնակցության նկատմամբ իշխանության վերաբերմունքին՝ Սաղաթելյանը նշել է, որ իր կարծիքով՝ խնդիրը միայն քաղաքական կուսակցության դեմ պայքարը չէ։
Նրա խոսքով՝ իշխանության գործողությունները վերաբերում են նաև ազգային գաղափարախոսությանը, հայկական ինքնությանը և համահայկական օրակարգին։
Սաղաթելյանը պնդել է, որ իշխանությունը փորձում է փոփոխություններ իրականացնել նաև երկրի Սահմանադրության մակարդակում՝ դրանք կապելով Ադրբեջանի և Թուրքիայի պահանջների հետ։
Ըստ ընդդիմադիր պատգամավորի՝ իշխանությունների պատկերացրած նոր Հայաստանը պետք է զերծ լինի պատմական հիշողությունից և ազգային ինքնության որոշ բաղադրիչներից։ Նա նաև նշել է, որ նման մոտեցման պայմաններում, իր գնահատմամբ, երկրորդական են դառնում հայ ժողովրդի իրավունքներն ու ազգային նշանակություն ունեցող հարցերը։
«ՔՊ-ն պետք է ամբողջությամբ արմատախիլ արվի»,- ասել է նա: