Ով էր պատասխանատուն այս ամենի
Fri, 25 Sep 2026 11:11:18 +0400
Արցախի ԱԺ պատգամավոր Մետաքսե Հակոբյանն անդրադարձել է 2023 թվականի սեպտեմբերին Արցախում տեղի ունեցած վառելիքի պահեստի պայթյունին՝ նշելով, որ ողբերգության հետևանքները մինչ օրս շարունակում են մնալ բազմաթիվ ընտանիքների կյանքի անբաժան մասը։
Նրա խոսքով՝ 2023 թվականի այդ օրերին Արցախում ստեղծված իրավիճակը քաոսային էր, իսկ վառելիքի պայթյունի հետևանքով հարյուրավոր արցախցիներ զոհվեցին։ Պայթյունի պահին բազմաթիվ մարդիկ փորձում էին լքել Արցախը և ճանապարհին իրենց ընտանիքներին անվտանգ վայր հասցնել, սակայն նրանցից մի մասը այդպես էլ տուն չհասավ։
Հակոբյանի փոխանցմամբ՝ այս պահին 22 մարդ շարունակում է համարվել անհայտ կորած։ Նրանց ընտանիքները, նրա խոսքով, արդեն երեք տարի սպասում են իրենց հարազատների ճակատագրի վերաբերյալ հստակ տեղեկությունների և պատասխանների։
Պատգամավորը նաև հարց է բարձրացրել ողբերգության օրերին Արցախի Պաշտպանության բանակում պատասխանատվություն կրող պաշտոնատար անձանց վերաբերյալ։ Մասնավորապես, նա հարցադրում է արել, թե ով էր պատասխանատու մարդկանց անվտանգության, վառելիքի կուտակման և հնարավոր վտանգների կանխարգելման համար։
Հակոբյանը քննադատել է այն հանգամանքը, որ այդ ժամանակվա ՊԲ հրամանատարը ներկայում զբաղեցնում է պաշտոն, մինչդեռ զոհերի և անհայտ կորածների հարազատները շարունակում են սպասել պատասխանների։ Նրա պնդմամբ՝ ընտանիքները նաև նշում են, որ հրամանատարը մինչ օրս չի հանդիպել իրենց։