Սեուլը չի ընդունում Կիևի ներողությունը․ միջազգային սկանդալ

Tue, 06 Oct 2026 15:30:00 +0400

Հարավային Կորեան Ուկրաինայից ներողություն է ստացել երկու հյուսիսկորեացի ռազմագերիների՝ Սեուլ տեղափոխման վերաբերյալ տեղեկատվության հրապարակման համար, սակայն այն անբավարար է համարել։ Yonhap-ի փոխանցմամբ՝ այս մասին հոկտեմբերի 6-ին հայտարարել է Հարավային Կորեայի արտաքին գործերի նախարար Չո Հյոնը։

Նա ասել է, որ մշտական ​​կապի մեջ է Ուկրաինայի արտաքին գործերի նախարար Անդրեյ Սիբիգայի հետ։ Ուկրաինացի նախարարը ներողություն է խնդրել, սակայն այն «չի համապատասխանում մեր սպասած մակարդակին»։

«Մենք մտադիր ենք վճռական միջոցներ ձեռնարկել», – հայտարարել է Չո Հյոնը։

Նա ընդգծել է, որ սկզբում երկու կողմերի միջև համաձայնություն է եղել չհրապարակել ռազմագերիների մասին տեղեկատվությունը։ Նախարարի խոսքով՝ դա անհրաժեշտ էր Հյուսիսային Կորեայում մնացած զինծառայողներին և նրանց ընտանիքներին պաշտպանելու համար։

Տեղեկատվության հրապարակումից հետո ուկրաինական կողմը հայտարարել է, որ գաղտնիության մասին որևէ համաձայնագիր գոյություն չունի։ Ի պատասխան՝ Սեուլը պահանջել է պաշտոնական բացատրություն և ներողություն։