Ադրբեջանի հետ խաղաղությունը կայացած փաստ է․ Փաշինյանը Պուտինին ևս շնորհակալ է
Fri, 09 Oct 2026 10:57:36 +0400
Հայաստանի և Ադրբեջանի միջև խաղաղությունը կայացած փաստ է։ Այս մասին հայտարարել է ՀՀ վարչապետ Նիկոլ Փաշինյանը՝ ելույթ ունենալով Թուրքմենբաշիում ընթացող ԱՊՀ պետությունների ղեկավարների խորհրդի նիստում։
ՀՀ վարչապետը մեջբերել է Ադրբեջանի հետ նախաստորագրված խաղաղության համաձայնագիրը, հատկապես հիշատակելով այն դրույթը, թե «կողմերը հաստատում են, որ միմյանց նկատմամբ տարածքային պահանջներ չունեն և ապագայում ևս այդպիսիք չեն ներկայացնի»։
Փաշինյանը հիշեցրել է, որ այս դրույթները պարունակող համաձայնագիրը նախաստորագրվել է 2025 թվականի օգոստոսի 8-ին՝ Սպիտակ տանը ԱՄՆ նախագահ Դոնալդ Թրամփի կողմից կազմակերպված խաղաղության գագաթնաժողովի ժամանակ։
«2020 թվականի պատերազմից ի վեր մենք մեծ ճանապարհ ենք անցել խաղաղության հասնելու համար։ Այս համատեքստում ես կցանկանայի հատկապես ընդգծել Ռուսաստանի նախագահ Վլադիմիր Պուտինի դերը 2020 թվականի նոյեմբերին հրադադարի հաստատման գործում։ Սակայն, ցավոք, նույնիսկ 2020 թվականի նոյեմբերի 9-ի Հայտարարությունը ստորագրելուց հետո մենք չկարողացանք հասնել խաղաղության», – նշել է ՀՀ վարչապետը։
Նիկոլ Փաշինյանի խոսքով՝ Հայաստանի և Ադրբեջանի միջև խաղաղության հասնելու միայն մեկ կենսունակ տարբերակ կար, և այս ճարտարապետությունը կառուցվել է Ալմաթիի հռչակագրի սկզբունքների վրա։