«Ուզում են մեր եղածը վերցնել». բողոքի ակցիա
Fri, 09 Oct 2026 14:05:47 +0400
Երևանի Շինարարների փողոցում նախատեսվող քանդման աշխատանքների դեմ բողոքի ակցիայի ժամանակ տնտեսվարողներից մեկը դժգոհել է, որ տարիներ շարունակ օրինական հիմունքներով գործունեություն ծավալելուց և հարկեր վճարելուց հետո կանգնել է իր կառուցած շինությունը կորցնելու վտանգի առաջ։
Նրա խոսքով՝ համայնքից վարձակալած հողի ժամկետը լրանալուց հետո բազմաթիվ դիմումներ են ներկայացրել, սակայն վարձակալության ժամկետը երկարաձգելու հնարավորություն չեն ստացել։ Տնտեսվարողը նշել է, որ հողատարածքում կառուցված շինությունն օրինական է, և իրենք ունեն սեփականության իրավունքը հաստատող փաստաթուղթ։
Նա նաև հարց է բարձրացրել, թե ինչ առավելություն ունեն այն տնտեսվարողները, որոնք 25 տարի օրինական աշխատել են, սեփականության վկայական են ունեցել և հարկեր վճարել, եթե այժմ նրանց գույքը նույնպես կարող է քանդվել։ Տնտեսվարողը նշել է, որ չի արդարացնում նաև անօրինական շինությունների առկայությունը, սակայն անհասկանալի է համարում օրինական գործունեություն ծավալած անձանց նկատմամբ կիրառվող մոտեցումը։
«Մեր եղածն ուզում են մեզնից առանց փոխհատուցման վերցնել, ո՛չ դատարանի որոշում են ցույց տալիս, ո՛չ էլ մեզ են ժամանակ տալիս, որ դատարան դիմենք՝ մեր եղածը պահենք»,- բողոքի ակցիայի ժամանակ ասել է նա՝ հավելելով, որ թաղապետարանն իրենց մինչ այժմ բնութագրել է որպես բարեխիղճ աշխատող տնտեսվարողների։