Նոր շունչ քաղաքին և տնտեսությանը. «Ռենշինի» համահիմնադիր Էդուարդ Մարությանը պարգևատրվել է Անանիա Շիրակացու մեդալով
Tue, 13 Oct 2026 13:05:03 +0400
Հայաստանի տնտեսության և քաղաքաշինության ոլորտում իրականացվող աննախադեպ ծրագրերը պետական ուշադրությանն են արժանացել։ Օրերս ՀՀ նախագահի հատուկ հրամանագրով պետական բարձր պարգևով՝ Անանիա Շիրակացու մեդալով է պարգևատրվել կառուցապատման շուկայի առաջատարներից մեկի՝ «Ռենշին» ընկերության համահիմնադիր Էդուարդ Մարությանը։
Մեդալը գործարարին անձամբ հանձնել է էկոնոմիկայի նախարար Գևորգ Պապոյանը՝ ընդգծելով նրա տնտեսական գործունեության կարևորությունն ու արժևորելով նրա ներդրած ավանդը՝ երկրի զարգացման գործում։ «Մենք պատրաստ ենք կանգնել մեր այն բոլոր գործարարների կողքին, ովքեր պատրաստ են և ուզում են միասին, արդար քրտինքով ու ստեղծագործ մտքով փոխել Հայաստանի Հանրապետությունը և այն դարձնել ավելի լավը»,- նշել է Պապոյանը։
Այս իրադարձությունը «Ռենշինում» համարում են մեծ պատիվ ու անցած արգասաբեր ճանապարհի վկայություն: Իսկ այդ ճանապարհի արդյունքներն իսկապես խոսուն են. այս պահին ընկերության ընթացիկ ներդրումները հասնում են 2 միլիարդի դոլարի, իսկ կառուցվող մակերեսը գերազանցում է 1 միլիոն քառակուսի մետրը:
Ներգրավելով աշխարհի հեղինակավոր ընկերություններին՝ «Ռենշինը» ոչ թե պարզապես շենքեր է կառուցում, այլ ձևավորում է նոր, ժամանակակից ներդրումային ու քաղաքային միջավայր: WTCY, ArtLife և Skyline հավակնոտ ու մասշտաբային մեգանախագծերն այն իրական արդյունքներն են, որոնք մայրաքաղաքում թելադրում են կենսակերպի բոլորովին նոր որակ։