«Գրենլանդիայում շուտով կսկսվեն նավթի, գազի և օգտակար հանածոների որոնողահետախուզական աշխատանքները»․ Թրամփ
Wed, 14 Oct 2026 20:30:32 +0400
ԱՄՆ նախագահ Դոնալդ Թրամփը հայտարարել է, որ շուտով երկրաբանական որոնողահետախուզական աշխատանքներ կսկսվեն Գրենլանդիայում։
«Շուտով կսկսվեն նավթի, գազի և օգտակար հանածոների լայնածավալ հետախուզական աշխատանքները մեր նոր՝ հիանալի Գրենլանդիայում»,- գրել է նախագահը Truth Social սոցիալական ցանցում։
Թրամփը նշել է, որ փորձագետների կարծիքով՝ Գրենլանդիայում կան հեշտ արդյունահանվող նավթի հսկայական պաշարներ, որոնք «շատ ավելի մեծ են, քան աշխարհի գրեթե ցանկացած այլ երկրի պաշարները»։
Նա հավելել է, որ Դանիայի ինքնավար տարածք հանդիսացող այս կղզին նաև «հավասարը չունի» ԱՄՆ-ի և Եվրոպայի պաշտպանության ու անվտանգության տեսանկյունից։ Թրամփը նշել է, որ ԱՄՆ տարածքի վրա ցանկացած հարձակում «անխուսափելիորեն կանցնի Գրենլանդիայի տարածքով», որտեղ տեղակայված պաշտպանական միջոցները կկարողանան «առանց դժվարության ոչնչացնել անօդաչու թռչող սարքերը, հրթիռները կամ սպառազինության այլ տեսակներ, որոնք դեռ նույնիսկ չեն հորինվել»։
Նշենք, որ ԱՄՆ-ն, Դանիան և Գրենլանդիան սեպտեմբերի 22-ին համաձայնագիր են ստորագրել կղզում ամերիկյան ռազմական ներկայությունն ընդլայնելու վերաբերյալ։