ԵՊՀ-ն ֆեմինիզմ է քարոզում
Wed, 14 Oct 2026 20:45:50 +0400
ԵՊՀ շարունակական կրթության կենտրոնում տեղի է ունեցել «Գենդերային հարաբերությունների վերարտադրությունը հայաստանյան ակադեմիական միջավայրում. առօրյա պրակտիկաներ և մասնագիտական ինքնություն» թեմայով որակական հետազոտության արդյունքների վավերացման կլոր սեղան-քննարկումը։ Քննարկումը կազմակերպել է Երևանի պետական համալսարանը՝ Գերմանիայի կառավարության ֆինանսավորմամբ Գերմանական միջազգային համագործակցության ընկերության (GIZ) կողմից իրականացվող «Ֆեմինիզմը գործողության մեջ՝ հանուն համակարգային փոխակերպման» (FAST) և «Կանանց հզորացում՝ հանուն բարեկեցության» (WoW) ծրագրերի շրջանակում։
Հետազոտության առանցքում հայաստանյան գիտական և ակադեմիական միջավայրում կանանց մասնագիտական ուղու, առաջխաղացման հնարավորությունների, առօրյա պրակտիկաների, ինչպես նաև համակարգային ու գենդերային այն գործոնների ուսումնասիրությունն է, որոնք կարող են ազդել գիտության ոլորտ նրանց մուտք գործելու, մասնագիտական շարունակականության և կարիերայի զարգացման վրա։ Մենք գրել էինք, որ Հայաստանի պետական տնտեսագիտական համալսարանն էլ երեկ կոչ էր արել միանալ Աննա Հակոբյանի կողմից իրականացվող ընտանեկան բռնության դեմ ուղղված ստորագրահավաքին, որով վարչապետի կինը փորձում է օրենսդրական նախաձեռնությամբ հանդես գալ եւ հատուկ պատիժներ սահմանել ընտանեկան բռնություն կիրառողներին: Ամերիկյան համալսարանում էլ ստորագրահավաքի սեղանիկ էին դրել։
ԵՊՀ-ի այս կոնֆերանսն էլ, ըստ էության, նույն թեմայի շրջանակներում է: Զավեշտալին այն է, որ նմանատիպ կոնֆերանսներով տպավորություն են փորձում ստեղծել, որ Հայաստանում կանայք որևէ ասպարեզում ակտիվ չեն, անգամ կրթության ոլորտում, սակայն գաղտնիք չէ, որ թե դպրոցներում ուսուցիչների, և թե բուհերում դասախոսների գերակշռող մասը կանայք են, պետական ապարատում եւս բարձր պաշտոններ են վստահվել կանանց` գրեթե բոլոր ուժային կառույցները, առողջապահության և կրթության ոլորտները կանայք են ղեկավարում: