Ուկրաինայի նախագահ Վլադիմիր Զելենսկին հայտարարել է, որ հանրապետության պաշտպանության ուժերը կվերսկսեն հարվածները ռուսական նավթավերամշակման գործարաններին, այն բանից հետո, երբ Միացյալ Նահանգները սահմանափակեց հետախուզական տվյալների փոխանակումը և Starlink արբանյակային ինտերնետային ծառայությունը ուկրաինական զորքերի համար:

Զելենսկին այս հայտարարությունն արել է Լոնդոնում Financial Times-ին տված հարցազրույցում։

«(Նավթավերամշակման գործարաններին հարվածելու արգելքը) վերացվել է: Մենք ավարտել ենք դա», – հայտարարել է Զելենսկին:

Նրա խոսքով, Ուկրաինան երեք օր չի հարվածել ռուսական էներգետիկ օբյեկտներին՝ ԱՄՆ նախագահ Դոնալդ Թրամփի կողմից հայտարարված «էներգետիկ հրադադարի» շրջանակներում: Միևնույն ժամանակ, Ռուսաստանը հարձակվել է ուկրաինական էներգետիկ օբյեկտների վրա:

Չնայած դադարին, ուկրաինական զորքերը ԱՄՆ-ից որևէ նախազգուշացում չեն ստացել բալիստիկ հրթիռների արձակման մասին: Starlink ծառայությունը ամբողջ երկրում դանդաղել է, ինչը բարդացնում է առաջնագծում գործողությունները:

Զելենսկու խոսքով՝ իրենց ամերիկացի գործընկերները հստակորեն զգուշացրել էին ուկրաինական զինվորականներին, որ եթե էներգետիկ օբյեկտներին հարվածները շարունակվեն, հետախուզական տվյալների փոխանակումը կարգելափակվի:

Կիևը հետագայում սա որակեց որպես «տեխնիկական խափանում»: «Դա տեխնիկական խնդիր չէր, դա կամքի հարց էր», – ասել է Ուկրաինայի նախագահը Starlink-ի անջատումների մասին։

Զելենսկին նաև ենթադրել է, որ հարվածներից հրաժարվելը միայն կհանգեցնի ԱՄՆ-ի և Ռուսաստանի նոր համաձայնագրերի կնքմանը. «Հարցն այն է, թե երբ կլինի հաջորդ համաձայնագիրը։ Այն կարող է գազի մասին լինել։ Այն անպայման գազի մասին կլինի»։