Միացյալ Նահանգներում վիրաբույժները կատարել են ավելի քան 24 ժամ տևած վիրահատություն՝ գլխով միաձուլված երկու տարեկան քույրերին բաժանելու համար։ Բարդ վիրահատությունը տեղի է ունեցել փետրվարին Սենթ Լուիս քաղաքի SSM Health Cardinal Glennon մանկական հիվանդանոցում (Միսուրիի նահանգ)։ Արդյունքների մասին տեղեկացրել է NBCNews-ը։

Հիյաբ և Վուհբտո քույրերը ծնվել են Եթովպիայում։ 2025 թվականի մարտին նրանք ընտանիքի հետ ժամանել են Միացյալ Նահանգներ՝ վիրահատությանը նախապատրաստվելու համար։ Այս տարվա փետրվարի 24-25-ին բժիշկները բաժանել են նրանց գլուխները 24 ժամից ավելի տևած վիրահատության ընթացքում։ Վիրահատությանը մասնակցել են բժշկական տարբեր ոլորտների մասնագետներ։

Աղջիկները ներկայում ինտենսիվ թերապիայի և վերականգնողական բաժանմունքում են՝ Միսուրիի Ռենկեն Ջորդան Բրիջ մանկական հիվանդանոցում։ Բժիշկները դեռևս չեն կարող վստահորեն ասել, թե ինչպես կազդի վիրահատությունը նրանց զարգացման վրա երկարատև հեռանկարում։

Բաժանումից հետո քույրերը հնարավորություն են ստացել զբաղվել անհատական ​​վերականգնողական բուժմամբ։ Նրանք սովորում են նստել, ուտել և խոսել ինքնուրույն, ինչպես նաև շփվել միմյանց և այլ երեխաների հետ։ Ապագայում մասնագետները հույս ունեն նրանց սովորեցնել կանգնել և քայլել։

Վիրահատության նախապատրաստմանը և իրականացմանը մասնակցել են Միացյալ Նահանգների և Եթովպիայի բժշկական և բարեգործական կազմակերպություններ, ինչպես նաև միջազգային այլ գործընկերներ։

«Դեռ վաղ է ասել, թե ինչպիսին կլինի նրանց երկարաժամկետ զարգացումը, բայց նրանք այժմ ունեն հնարավորություններ, որոնք չէին ունենա առանց այս միջամտության», – ասել է Կարդինալ Գլենոնի SSM Health կլինիկայի նյարդավիրաբուժության տնօրեն Ջոաննա Քեմփը։

Միաձուլված երկվորյակները հազվադեպ են հանդիպում. ԱՄՆ Ազգային բժշկական գրադարանի տվյալներով՝ այս վիճակը հանդիպում է մոտավորապես 50-100 հազար կենդանի ծնունդներից մեկի մոտ։ Աղջիկները միաձուլված ծնվում են մոտ երեք անգամ ավելի հաճախ, քան տղաները։

Սիամական երկվորյակները ծնվում են հղիության շատ վաղ փուլերում նույնաձու սաղմերի զարգացման խափանման հետևանքով։ Սովորաբար, նույնաձու երկվորյակների պարագայում բեղմնավորված ձվաբջիջը բաժանվում է երկու անկախ սաղմերի՝ բեղմնավորումից հետո առաջին հինգ-վեց օրվա ընթացքում։ Եթե բաժանումն ուշանում է և տեղի է ունենում բեղմնավորումից հետո 13-15-րդ օրերի միջև, սաղմի բջիջներն արդեն սկսում են «մասնագիտանալ» և ձևավորել օրգաններ, և դրա պատճառով սաղմերի տարանջատումը չի կարող ամբողջությամբ ավարտվել։ Այս մասին հայտնում է NEWS.am Medicine-ը։