«Հրապարակ»․ Նորից դատավորների հետեւից են ընկել
Fri, 16 Oct 2026 10:25:54 +0400
Բարձրագույն դատական խորհրդում այս պահին երեք կարգապահական վարույթ է քննվում՝ դատավորներ Նորա Կարապետյանի, Գեւորգ Մանուկյանի եւ Անի Մխիթարյանի նկատմամբ։ Մանուկյանի եւ Կարապետյանի դեմ վարույթները հարուցել է արդարադատության նախարարությունը՝ Սրբուհի Գալյանի գլխավորությամբ, իսկ Մխիթարյանի նկատմամբ կարգապահական պատասխանատվության ենթարկելու միջնորդությունը ներկայացրել է Դատավորների ընդհանուր ժողովի էթիկայի եւ կարգապահական հարցերի հանձնաժողովը։
Վերջին ամիսներին, անգամ վերջին տարին, դատավորներին կարգապահական պատասխանատվության ենթարկելու գործընթացը կարծես հանդարտվել էր, սակայն այս աշնանը կրկին թափ է հավաքել։ Դատական համակարգի մեր աղբյուրների փոխանցմամբ՝ դատավորներին «պատժելու» հարցում նախարար Սրբուհի Գալյանի գերատեսչությունն առանձնակի ակտիվություն է ցուցաբերում։ Եթե քաղաքացիների եւ փաստաբանների դիմումները Դատավորների ընդհանուր ժողովի էթիկայի եւ կարգապահական հարցերի հանձնաժողովում հաճախ մերժվում են, ապա արդարադատության նախարարությունում նույն դիմումները շատ հաճախ դառնում են դատավորների դեմ կարգապահական վարույթներ հարուցելու առիթ։ Կա՛մ Սրբուհի Գալյանը վերեւից նման հրահանգ է ստացել, կա՛մ ձգտում է հետ չմնալ նախորդներից` Կարեն Անդրեասյանից եւ Գրիգոր Մինասյանից, որոնց ժամանակ մեծ թվով լավ դատավորներ զրկվեցին իրենց կարգավիճակից` տեղը զիջելով երիտասարդ, անփորձ եւ հեշտ կառավարելի դատավորներին: Փորձառու եւ գրագետ դատավորներին կարգապահական պատասխանատվության ենթարկելու հարցը կրկին օրակարգային է դարձել, եւ նախարարությունը հետեւողականորեն գնում է դատավորներին պատժելու ճանապարհով։