Պետրակովը վերադառնում է
Thu, 22 Oct 2026 21:45:07 +0400
Ուկրաինացի հայտնի մասնագետ Ալեքսանդր Պետրակովը վերսկսում է մարզչական կարիերան՝ երկու տարվա դադարից հետո գլխավորելով ուկրաինական «Կրիվբասը»։ 69-ամյա մարզիչը թիմում փոխարինել է հոլանդացի մասնագետ Պատրիկ վան Լեուվենին։
Պետրակովը հաստատել է, որ պայմանագիր է ստորագրել ակումբի հետ։ Նրա խոսքով՝ հոկտեմբերի 20-ին հանդիպել է «Կրիվբասի» նախագահ Կոնստանտին Կարամանեցին և գլխավոր տնօրեն Վլադիմիր Բայենկոյին, որից հետո կողմերը համաձայնության են եկել համագործակցության շուրջ։
«Ես աշխատանքի եմ գնում։ Այժմ ճանապարհին եմ դեպի Կրիվոյ Ռոգ»,- նշել է մասնագետը։
Նոր գլխավոր մարզչին բարդ առաջադրանք է սպասվում։ «Կրիվբասը» Ուկրաինայի Պրեմիեր լիգայի մրցաշարային աղյուսակի վերջին հորիզոնականում է՝ վաստակած ունենալով ընդամենը 5 միավոր։ Պետրակովը պետք է հնարավորինս արագ ծանոթանա թիմին և փորձի բարելավել դրա արդյունքները։
Մարզիչը հատկապես մեծ փորձ ունի երիտասարդ ֆուտբոլիստների հետ աշխատելու հարցում։ Նրա գլխավորությամբ Ուկրաինայի մինչև 20 տարեկանների հավաքականը 2019 թվականին դարձել է աշխարհի չեմպիոն՝ գրանցելով իր պատմության կարևորագույն հաջողություններից մեկը։
2021-2022 թվականներին Պետրակովը գլխավորել է Ուկրաինայի ազգային հավաքականը, իսկ 2023 թվականի հունվարին ստանձնել է Հայաստանի ազգային հավաքականի գլխավոր մարզչի պաշտոնը։ Նա Հայաստանի ընտրանին ղեկավարել է մինչև 2024 թվականի հոկտեմբեր: