Հոկտեմբերի 29-ին Բաքվում Թուրքիայի դեսպանատանը Թուրքիայի Հանրապետության օրվա առթիվ կազմակերպված ընդունելությանը Ադրբեջանը ներկայացրել է թվային զարգացման և տրանսպորտի նախարար Ռաշադ Նաբիևը։ Նախկինում նման միջոցառումներին Բաքուն ներկայացնում էր Միլի Մեջլիսի նախագահ Սահիբա Գաֆարովան։

Ներկայացվածության մակարդակի այս փոփոխությունը տեղի է ունեցել թուրք-ադրբեջանական հարաբերությունների լարվածության ֆոնին։ Ադրբեջանական իշխանամերձ լրատվամիջոցները, սակայն, նշում են, որ նման քայլի առաջինը դիմել է Անկարան։

Մասնավորապես, Qafqazinfo-ի փոխանցմամբ՝ մայիսի 28-ին՝ Ադրբեջանի Անկախության օրվա տոնակատարության ժամանակ, Թուրքիան ներկայացրել է ոչ թե խորհրդարանի խոսնակը կամ փոխնախագահը, ինչպես ընդունված էր նախկինում, այլ տրանսպորտի և ենթակառուցվածքների նախարար Աբդուլքադիր Ուրալօղլուն։ Ադրբեջանական լրատվամիջոցների գնահատմամբ՝ Բաքուն պարզապես կիրառել է դիվանագիտության մեջ ընդունված փոխադարձության սկզբունքը։

Բաքվի դժգոհությունը, սակայն, կապված է նաև մեկ այլ դրվագի հետ։ Թուրքիայի արտաքին գործերի նախարարությունը մերժել է Ադրբեջանի դեսպանատան խնդրանքը՝ Անկախության օրվա առթիվ խորհրդանշական նշանակություն ունեցող օբյեկտները լուսավորել Ադրբեջանի պետական դրոշի գույներով։ Նախկինում նման խնդրանքները, ըստ ադրբեջանական կողմի, բավարարվել են։ Մերժման պատճառը հայտնի չէ։

Ադրբեջանական լրատվամիջոցները հարց են բարձրացնում, թե ինչու են նույնիսկ հարգանքի խորհրդանշական դրսևորումները դառնում դիվանագիտական տարաձայնությունների առարկա, եթե Անկարան առանձնահատուկ նշանակություն է տալիս Ադրբեջանի հետ հարաբերություններին։

Միաժամանակ, հոկտեմբերի 29-ին Ադրբեջանի Միլի Մեջլիսի 53 պատգամավորներ ծաղիկներ են խոնարհել Բաքվում՝ Մուստաֆա Քեմալ Աթաթուրքի հուշարձանին։ Ադրբեջանական հրապարակումներում ընդգծվում է, որ Աթաթուրքին և թուրք ժողովրդին հարգանքի տուրք մատուցելը չի նշանակում անվերապահորեն հավանություն տալ Անկարայի ներկայիս որոշումներին։

Երկու երկրների հարաբերությունները լարվել են այն բանից հետո, երբ Ադրբեջանն անցած ամիս արգելել է դպրոցներում գլխաշոր կրելը։ Այդ որոշումը Թուրքիայում բողոքի ալիք և քննադատություն է առաջացրել։ Հոկտեմբերի 25-ին Թուրքիայի նախագահ Ռեջեփ Թայիփ Էրդողանը պաշտոնանկ էր արել նախագահի գլխավոր խորհրդական Օքթայ Սարալին, որը քննադատել էր այդ արգելքը։ Այդ քայլը դիտարկվել էր որպես լարվածությունը մեղմելու փորձ։

Այնուամենայնիվ, Ադրբեջանի նախագահ Իլհամ Ալիևը չի մասնակցել Անկարայում կայացած Թյուրքական պետությունների կազմակերպության երկրների ղեկավարների գագաթնաժողովին։