Մտածում էի՝ հրաժարական կտայիք
Wed, 04 Nov 2026 11:25:28 +0400
ԱԺ-ում 2027 թվականի պետական բյուջեի քննարկման ժամանակ «Ուժեղ Հայաստան» խմբակցության պատգամավոր Էդգար Ղազարյանը կոշտ քննադատության է ենթարկել ներքին գործերի նախարար Արփինե Սարգսյանին՝ պահանջելով նրա հրաժարականը։
Պատգամավորը նշել է, որ չէր սպասում նախարարին տեսնել խորհրդարանում՝ գիշերը տեղի ունեցած ողբերգական ավտովթարից հետո։
Հիշեցնենք, որ Ուշիի ոլորաններում տեղի ունեցած վթարի հետևանքով 9 մարդ զոհվել է, ևս 3-ը՝ ստացել վնասվածքներ։
Ղազարյանը հիշեցրել է, որ ՆԳ նախարարության պատասխանատվության շրջանակում են վարորդական վկայականների տրամադրումը, տրանսպորտային միջոցների տեխնիկական զննության վերահսկողությունը, ճանապարհային նշանների տեղադրումն ու տեսադիտարկման համակարգերի աշխատանքը։ Նրա խոսքով՝ այս բոլոր մեխանիզմների առկայությամբ մեկ օրվա ընթացքում 9 քաղաքացու մահը լուրջ հարցեր է առաջացնում ոլորտի պատասխանատուների գործունեության վերաբերյալ։
Պատգամավորը նաև զուգահեռներ է անցկացրել նախկին ողբերգական դեպքերի հետ՝ հիշեցնելով Ազատի զինվորական կացարանում տեղի ունեցած հրդեհը, որի հետևանքով 15 զինծառայող էր զոհվել, ինչպես նաև «Սուրմալու» առևտրի կենտրոնի պայթյունը, որի հետևանքով 16 քաղաքացի էր մահացել։ Ղազարյանի դիտարկմամբ՝ այդ դեպքերից հետո ևս պատասխանատու նախարարները շարունակել են պաշտոնավարել։
«Կարծում եմ՝ այսօրվա հետևությունը ձեզ համար միայն մեկը պետք է լիներ՝ ձեր այս մեծ ձախողումն արձանագրել հրաժարականով ու հեռանալ պաշտոնից»,– հայտարարել է պատգամավորը։