Ախուրիկի և Ղարիբջանյանի բնակիչները՝ հայ-թուրքական սահմանի բացման մասին
Wed, 04 Nov 2026 21:00:39 +0400
«Հայաստան-Թուրքիա մեդիա տուր»-ի ընթացքում հայ և թուրք լրագրողներն անանուն հարցում են անցկացրել Թուրքիային սահմանակից Ախուրիկ ու Ղարիբջանյան գյուղերում և փորձել հասկանալ տեղի բնակիչների տրամադրվածությունը հայ-թուրքական սահմանի բացման և Գյումրի-Ախուրիկ-Աքյաքա երկաթուղու հնարավոր գործարկման վերաբերյալ։
«Ի՞նչ եք կարծում հայ-թուրքական սահմանը կբացվի՞, թե՞ ոչ» հարցին ի պատասխան՝ տեղացիներից մեկն արձագանքեց․ «Մի ծաղկով գարուն չի գա, պետական որոշում պետք է լինի»։ Նա հիշեց, որ 1993-ից հետո Թուրքիան տարեկան կորցրել է միլիոնավոր դոլարներ՝ փակելով երկաթգիծը, որն օգուտ էր բերում հայերին, վրացիներին ու ադրբեջանցիներին։
Հիշեցնենք, որ Թուրքիայից Հայաստան ցորենի մատակարարումն իրականացվել 1992-ին Հայաստանի առաջին նախագահ Լևոն Տեր-Պետրոսյանի նախագահության և Խոսրով Հարությունյանի վարչապետության օրոք։
Տեղացիներից մեկն էլ նշեց, որ 15 տարի աշխատել է երկաթուղում՝ ցորեն է դատարկել վագոններից։ Հիշում է, որ Թուրքիայից ցորեն էր եկել Հայաստան երկաթուղիով ու եթե երկաթուղին հիմա էլ աշխատի, գյուղից շատ մարդ կգնա աշխատելու։ Ըստ նրա՝ գյուղում աշխատատեղ չկա, եթե գործարկվի երկաթուղին մարդիկ զբաղվածություն կունեան։
Ինքը կողմ է, որ սահմաները բացվեն ու ժողովուրդներն առևտուր անեն։ Հիշում է նաև, որ ժամանակին Թուրքիային ցեմենտ են տվել, փոխարենը մսամթերք վերցրել։ Բնակչի խոսքով՝ հարևանների հետ պիտի շփում ունենաս ու առևտուր անես, միգուցե խաղաղության համար հենց դա է պետք։
«Արդյո՞ք կողմ են սահմանի բացմանը» հարցին ի պատասխան՝ տեղացի կանանցից մեկը նշել է, որ սահմանի բացման պարագայում տնտեսությունը կարող է զարգանալ ու ավելի դրական փոփոխություններ կլինեն։ Ըստ նրա՝ եթե սահմանը բացվի, գյուղից կարող են կարտոֆիլ, կաղամբ ու գազար արտահանել։
Դիտարկմանը, թե ինչպե՞ս է պատկերացնում հայերի ու թուրքերի շփումները, բնակչուհին թեև հայտնեց մտավախություն թուրքերի հետ շփման պարագայում, բայց նաև կարծքի հայտնեց, որ ժամանակի ընթացքում գուցե վստահություն ձևավովի։
«Պետք է գան շփվենք, որ տեսնենք ինչ ձևի մարդիկ են։ Եթե շփվենք ու տեսնեք, որ լավ մարդիկ են, նորմալ կընդունենք իրենց։ Գիտեք ինչ, համ հայերի մեջ լավ մարդիկ կան, համ էլ թուրքերի, բայց դե վատն էլ կա»։
Մեկ այլ բնակիչ էլ նշեց, որ երբ սահմանները բաց են եղել, ինքն այդ ժամանակ ոչ մի վատ կամ բացասական բան չի հիշում։ Բայց հիմա ժամանակները փոխվել են, ամեն ինչն է փոխվել ու, թե ինչ կլինի, դժվարացավ պատասխանել, գրում է Ermenihaber-ը։