Էլի՞ պատերազմ․ Թեհրանը մեղադրում է ԱՄՆ-ին

Sat, 27 Jun 2026 13:30:27 +0400

Իրանի հարավային ափին գտնվող մի քանի ափամերձ վերահսկողության օբյեկտների վրա երեկ գիշեր ԱՄՆ-ի կողմից իրականացված օդային հարվածները ՄԱԿ-ի կանոնադրության և Իրանի ու ԱՄՆ-ի միջև ստորագրված փոխըմբռնման հուշագրի առաջին կետի ակնհայտ խախտում են, ասվում է Իրանի արտաքին գործերի նախարարության հայտարարության մեջ։

«Իրանի արտաքին գործերի նախարարությունը խստորեն դատապարտում է Իրանի հարավային ափին գտնվող մի քանի օբյեկտների վրա երեկ գիշեր ԱՄՆ-ի կողմից իրականացված օդային հարվածները։ Իրանը մի քանի ափամերձ վերահսկողության օբյեկտների վրա կատարված հարվածները համարում է ՄԱԿ-ի կանոնադրության 2-րդ հոդվածի 4-րդ կետի, ինչպես նաև Իրանի ու ԱՄՆ-ի միջև ստորագրված պատերազմի ավարտի մասին Իսլամաբադի փոխըմբռնման հուշագրի առաջին կետի ակնհայտ խախտում», – ասվում է հայտարարության մեջ։

Իրանի արտաքին գործերի նախարարությունը ընդգծում է, որ Իսրայելի կողմից Լիբանանի վրա ԱՄՆ-ի հետ համակարգված հարձակումը փոխըմբռնման հուշագրի առաջին կետի ակնհայտ խախտում է։

«Ակնհայտ է, որ ստեղծված իրավիճակի համար պատասխանատվությունը կրում են ԱՄՆ-ն և Իրանի դեմ հարձակումներին ներգրավված ցանկացած կողմ», – ասվում է հայտարարության մեջ։

Արտաքին գործերի նախարարությունը նշել է, որ Իրանը կոչ է անում Պարսից ծոցի հարավային երկրներին պահպանել միջազգային իրավունքը և բարիդրացիության սկզբունքը՝ կանխելու համար իրենց տարածքների օգտագործումը Իրանի դեմ հարձակումներ իրականացնելու համար։

Նախարարությունը հավելել է, որ Իրանը կոչ է անում ՄԱԿ-ի գլխավոր քարտուղարին և ՄԱԿ-ի Անվտանգության խորհրդին, ինչպես նաև այլ պատասխանատու միջազգային շրջանակներին անտարբեր չմնալ ՄԱԿ-ի կանոնադրության սկզբունքների այս ակնհայտ խախտման նկատմամբ։