Խորհրդարանական մեծամասնությունն Ազգային ժողովը դարձրել է սեփական դուքյանը, ասենք՝ կարող են մշտական հանձնաժողովի նիստ նշանակել, բոլորը ներկայանան, լրագրողները հավաքվեն խորհրդարանում, եւ վերջին պահին, առանց որեւէ բացատրության, հայտնեն, որ նիստը 2 ժամով հետաձգվում է։ Վլադիմիր Վարդանյանի ղեկավարած Պետաիրավական մշտական հանձնաժողովը երեկ առավոտյան՝ 11.00-ին նիստ էր հրավիրել։ Ուշացումով ժամանած Վարդանյանը հայտնեց, որ այն տեղափոխվում է 13.00՝ որոշ խնդիրների պատճառով։ Հանձնաժողովի ներկա անդամներից մեկն ասաց, որ որոշ հանձնաժողովականներ են երեկոյան խնդրել նիստը հետաձգել, քանի որ գործուղումից ուշ են վերադարձել, պետք է առավոտյան քնեն, հանգստանան, չեն կարող 11.00-ին ԱԺ գալ։

Խոսքը ՔՊ-ականներ Ալխաս Ղազարյանի, Լիլիթ Մինասյանի եւ ՀՅԴ-ական Արծվիկ Մինասյանի մասին է, որոնք գործուղմանն էին մեկնել Բելգիա։ Ալխաս Ղազարյանը թեպետ եկել էր, եւ քվորումի խնդիր չկար, բայց Վարդանյանը, հավանաբար, որոշեց մյուս գործընկերներին ընդառաջել եւ նիստը սկսեց 2 ժամ ուշ։ Ի դեպ, ԱԺ կայքից տեղեկացանք, որ «ճանաչողական այցով «Ժողովրդավարության աջակցման եւ ընտրությունների համակարգման խումբ» ծրագրի աշխատանքներին մասնակցելու համար» փետրվարի 23-25-ը Բրյուսել են գործուղվել մի խումբ իշխանական եւ ընդդիմադիր պատգամավորներ՝ Արման Եղոյանը, «Պատիվ ունեմ» խմբակցության ղեկավար Հայկ Մամիջանյանը, Բաբկեն Թունյանը, Արծվիկ Մինասյանը, Ալխաս Ղազարյանը, Լիլիթ Մինասյանը, Աննա Գրիգորյանը եւ Արթուր Խաչատրյանը։ Ընդդիմադիրները հայտարարում են, որ այս գործուղումներն օգտագործում են միջազգային կապերն ամրապնդելու եւ Հայաստանի մասին իրականությունը տեղ հասցնելու նպատակով։