Ամեն օր Հայաստանի վրա 3 միլիոն դոլար պարտք է

Fri, 27 Mar 2026 11:16:50 +0400

Գորիսում համակիրների հետ հանդիպման ընթացքում «Ուժեղ Հայաստան» կուսակցության խորհրդի անդամ Նարեկ Կարապետյանը հանդես է եկել տնտեսական իրավիճակի վերաբերյալ քննադատական գնահատականներով։

Նրա խոսքով՝ վերջին ութ տարիների ընթացքում երկրի ղեկավարությունը ավելի մեծ ծավալի պետական պարտք է կուտակել, քան նախորդ շուրջ երեք տասնամյակների ընթացքում միասին վերցրած։ Կարապետյանը նշել է, որ ամեն օր Հայաստանի համար երեք միլիոն դոլար պարտք է՝ ընդգծելով, որ երկիրը փաստացի գործում է վարկային միջոցների հաշվին, իսկ օտարերկրյա ներդրումների ներհոսքը գրեթե բացակայում է։

Նա նաև հարց է բարձրացրել, թե արդյոք վերջին տարիներին որևէ խոշոր միջազգային ընկերություն մուտք է գործել հայկական շուկա կամ նկատվել է աշխատատեղերի էական աճ։ Նրա գնահատմամբ՝ իրականացված որոշ ծրագրեր, օրինակ՝ ճանապարհաշինությունը, ֆինանսավորվել են պետական բյուջեից և պարտքային միջոցներից, սակայն չեն ապահովել եկամտաբերություն։ Կարապետյանը շեշտել է, որ արդյունավետ կառավարման դեպքում առաջնահերթ պետք է լինեն այն ծրագրերը, որոնք ապահովում են տնտեսական աճ և նոր աշխատատեղեր։

Քաղաքական գործչի համոզմամբ՝ հայերը բնույթով ձեռներեց են և արտերկրում հաճախ հասնում են հաջողությունների, ինչը վկայում է նրանց աշխատասիրության և ունակությունների մասին։ Սակայն, նրա կարծիքով, Հայաստանում տնտեսական վիճակը շարունակում է մնալ բարդ, և երկիրը տարածաշրջանում համարվում է առավել աղքատներից մեկը։

Կարապետյանը նշել է, որ մինչ այժմ չի ձևավորվել այնպիսի ղեկավարություն, որը լիարժեք կկարողանա հասկանալ և զարգացնել տնտեսությունը։ Այդ համատեքստում նա առաջարկել է փորձել նոր մոտեցում՝ աջակցելով իրենց կուսակցության վարչապետի թեկնածուին՝ Սամվել Կարապետյանին: