Պատերազմը շուտով կավարտվի․ Թրամփը դիմել է ամերիկացիներին
Thu, 02 Apr 2026 10:00:37 +0400
ԱՄՆ նախագահ Դոնալդ Թրամփը 19 րոպեանոց հեռուստաուղերձով դիմել է ազգին՝ վերահաստատելով, որ մարտական գործողությունները մոտենում են ավարտին և կրկին սպառնացել Թեհրանին «չափազանց ուժեղ հարվածով»։
Նա, մասնավորապես, հայտարարել է, որ ամերիկյան զինված ուժերը գրեթե հասել են Իրանի հետ պատերազմում իրենց նպատակներին, և որ հակամարտությունը շուտով կավարտվի։
«Մենք ավարտելու ենք աշխատանքը, և մենք այն շատ արագ կավարտենք։ Մենք շատ մոտ ենք։ Ես ուզում եմ շնորհակալություն հայտնել Մերձավոր Արևելքում մեր դաշնակիցներին՝ Իսրայելին, Սաուդյան Արաբիային, Կատարին, ԱՄԷ-ին, Քուվեյթին և Բահրեյնին։ Նրանք հիանալի են եղել, և մենք թույլ չենք տա, որ նրանք վնասվեն կամ որևէ կերպ ձախողվեն», – ասել է Թրամփը։
Սպիտակ տան ղեկավարը պնդել է կրկին, որ ԱՄՆ-ն ոչնչացրել է Իրանի ռազմածովային ուժերը և օդուժը, ինչպես նաև կաթվածահար է արել նրա բալիստիկ հրթիռների և միջուկային զենքի ծրագրերը։ Նրա խոսքով՝ հարվածները կշարունակվեն հաջորդ երկու-երեք շաբաթվա ընթացքում. «Այսօր կարող եմ ասել, որ մենք մեր բոլոր ռազմական նպատակներին հասնելու ճիշտ ուղու վրա ենք։ Մենք նրանց չափազանց ուժեղ հարվածելու ենք հաջորդ երկու-երեք շաբաթվա ընթացքում։ Մենք նրանց կվերադարձնենք քարե դար, որտեղ նրանք պետք է լինեն»։
Թրամփը նաև կրկնել է այն միտքը, որ ԱՄՆ-ն կարիք չունի Հորմուզի նեղուցով մատակարարումների, որն արդեն մեկ ամիս է՝ փաստացի փակել է Թեհրանը։ Նրա խոսքով, այն երկրներից է կախված, որոնք այն օգտագործում են նավթի փոխադրման համար. «Նրանք պետք է գրավեն այն [նեղուցը] և գնահատեն այն։ Նրանք կարող են հեշտությամբ դա անել։ Մենք կօգնենք, բայց նրանք պետք է առաջատար դեր ստանձնեն այն նավթի պաշտպանության գործում, որից այդքան մեծապես կախված են»։
Ամերիկացի առաջնորդը պնդել է, որ ԱՄՆ-ն պատրաստ է ոչնչացնել Իրանի էլեկտրակայաններն ու նավթային ենթակառուցվածքները, եթե Թեհրանը հրաժարվի համաձայնության գալ Վաշինգտոնի հետ։ Նրա խոսքով՝ Միացյալ Նահանգները փորձում է համաձայնության գալ Իրանի նոր ղեկավարության հետ. «Նոր խումբը պակաս արմատական է և շատ ավելի զգուշավոր։ Այնուամենայնիվ, եթե այդ ժամկետում համաձայնության չհասնենք, մենք կշարունակենք մեր ուշադրությունը կենտրոնացնել հիմնական թիրախների վրա։ Եթե համաձայնագիր չլինի, մենք շատ ուժեղ կհարվածենք նրանց բոլոր էլեկտրակայաններին, և, հավանաբար, միաժամանակ… Մենք չենք հարվածել նրանց նավթային օբյեկտներին, չնայած դա ամենահեշտ թիրախն է, քանի որ դա նրանց նույնիսկ չնչին հնարավորություն չէր թողնի գոյատևելու կամ վերականգնվելու։ Բայց մենք կարող էինք հարվածել, և ամեն ինչ կոչնչանար, և նրանք ոչինչ չէին կարողանա անել դրա հետ»։