Էլի մարդ կա՞, որ իր հաղթանակը նվիրելու է Ռոբերտ Քոչարյանին
Sat, 11 Apr 2026 15:45:46 +0400
Գագիկ Ծառուկյանի հայտարարությունը, որ խորհրդարան անցնելուց հետո ինքը վարչապետի թեկնածու չի լինելու եւ Ռոբերտ Քոչարյանի պարագայում էլ չի աջակցելու նրան, բուռն ոգեւորություն է առաջացրել ոչ թե ՔՊ-ում, այլ ՀՀԿ-ին առնչակից կիսաքաղաքական բոստաններում, ի մասնավորի՝ հարգարժան Սամվել Ֆարմանյանի եւ «յոթծովիմերան» Նարեկ Մալյանի ֆեյսբուքյան տնամերձներում: Բա որ ասում էինք, բա որ այսքան աղաղակում էինք, որ Ռոբերտ Քոչարյանն անցողիկ չէ… Տեսա՞ք Գագիկ Ծառուկյանն էլ է մերժում նրան: ՔՊ-ն, սակայն, Գագիկ Ծառուկյանի այդ հայտարարությունից, ինչպես ասացի, այս տղաների չափ ոգեւորված չէ:
Ես ՔՊ-ի հետ որեւէ խնդիր չունեմ: Իրենց իրավունքն է, ինչպես ուզում են՝ թող մեկնաբանեն Գագիկ Ծառուկյանի այդ հայտարարությունը: Ինձ մտահոգում են Սամվել Ֆարմանյանի եւ Նարեկ Մալյանի ֆեյսբուքյան «հոգեցունց» գրառումներն այդ կապակցությամբ, որոնք գրեթե տառետառ համընկնում են: Տղաներ, դուք լո՞ւրջ եք ասում, դուք իսկապե՞ս մտածում եք, որ Գագիկ Ծառուկյանը, որ այսպես աղմուկ-աղաղակով խորհրդարան է գնում, կարող էր հայտարարել, թե դա անում է ոչ իր ուժի թեկնածուին վարչապետ դարձնելու նպատակով: Մարդն ասում է՝ ես իմ թիմում վարչապետի 4 թեկնածու ունեմ… Եվ, ուրեմն, պարոնայք Ֆարմանյան եւ Մալյան, ինչո՞ւ եք խեղաթյուրում Գագիկ Ծառուկյանի՝ խորհրդարանական ընտրություններին մասնակցելու նպատակները:
Ես հիմա արդեն լուրջ կասկածներ ունեմ, որ ՔՊ-ական քարոզչամեքենայի բաց թողած հիմար թեզը, թե Սամվել Կարապետյանը մասնակցում է խորհրդարանական ընտրություններին, որպեսզի հաղթի եւ իր հաղթանակը «նվիրի» Ռոբերտ Քոչարյանին, առաջացել է նույն հարթակում, որտեղ հաճախ են լինում հիշատակածս քաղաքագետները՝ Սամվել Ֆարմանյանը եւ Նարեկ Մալյանը: Իսկ թե ով է ղեկավարում այդ հարթակը, որ ստեղծվել է «Հայաստան» դաշինքի մասին սուտ լուրեր տարածելու համար, թույլ տվեք ասել, դժվարանում եմ գլխի ընկնել: Բայց ով էլ լինի այդ հարթակի ղեկավարը, պիտի ասեմ, որ քաղաքական իմաստով սահմանափակ ուղեղի տեր անձնավորություն է, ոչ այն է՝ բացահայտ նիկոլական, ոչ այն է՝ լավ ծպտված ընդդիմադիր:
Վերջերս Արամ Զավենի Սարգսյանը բաց տեքստով հայտարարել էր, որ «Հանրապետություն» կուսակցությունը միայնակ է մասնակցելու խորհրդարանական ընտրություններին, հաղթահարելու է անցողիկ շեմը եւ աջակցելու է Նիկոլ Փաշինյանին՝ վերարտադրվելու վարչապետի պաշտոնում: Տափա՞կ հայտարարություն է… Իհարկե: Բայց ասեմ՝ ազնիվ է: Զավենիչը չի դավաճանել իրեն: Ինչ կա, ինչ գիտի քաղաքականության մասին, այդ էլ ասում է՝ իր թիմին, կներեք, շան տեղ չդնելով: Գագիկ Ծառուկյանն ասում է՝ ես վարչապետի 4 թեկնածու ունեմ: Արամ Զավենիչը, փաստորեն, մեկն էլ չունի, չնայած որ հենց ինքն է մի ժամանակ (Ռոբերտ Քոչարյանի օրոք) վարչապետ եղել: Բայց եկեք փառք տանք Աստծուն, որ Սամվել Ֆարմանյանն ու Նարեկ Մալյանը, լսելով Արամ Զավենիչի հայտարարությունը՝ խորհրդարան մտնելու նպատակների մասին, իրենց ֆեյսբուքյան տնամերձներում չեն գրել, որ Արամ Զավենիչը «մերժել» է Ռոբերտ Քոչարյանին, հետեւաբար, «Հայաստան» դաշինքն անցողիկ շեմը հաղթահարելու շանս չունի: