«Հրապարակ». 17 օրում չեն կարողացել ամփոփել արդյունքները

Thu, 14 May 2026 11:15:23 +0400

Հանրակրթական դպրոցներում ուսուցիչների կամավոր ատեստավորման գործընթացը մեկնարկել է 2021 թվականին։ Անցած հնգամյակում ուսուցիչներից բազում դժգոհություններ եղան ատեստավորման ժամանակի սղության, տրված հարցերի խրթինության, դասավանդվող առարկային առնչության եւ այլնի վերաբերյալ։ ԿԳՄՍ նախարարությունն ատեստացիայի գործընթացում սրբագրումներ արեց, իջեցրեց անցողիկ միավորի շեմը, կրկնակի ատեստավորումներ կազմակերպեց եւ այլն։ Չնայած դրան՝ հանրակրթական դպրոցների բազմաթիվ ուսուցիչներ 2 եւ ավելի անգամ բացասական գնահատական են ստացել կամավոր ատեստավորման ժամանակ։ Մայիսի 5-ին ԿԳՄՍՆ-ին հարցում էի արել ապրիլի 26-ին նախատեսված ատեստացիայի լրացուցիչ փուլի մասին, որը նախատեսված էր այն ուսուցիչների համար, ովքեր նախկինում 2 եւ ավելի անգամ բացասական արդյունք են ունեցել կամավոր ատեստավորումից։

Հարցրել էի. «Լրացուցիչ ատեստացիան կամավո՞ր, թե՞ պարտադիր է եղել նախկինում 2 եւ ավելի անգամ բացասական արդյունք ունեցած ուսուցիչների համար։ Քանի՞ ուսուցիչ է մասնակցել այս փուլին, քանի՞սն է դրական արդյունք ունեցել, բացասական արդյունք ունեցած ուսուցիչները շարունակելո՞ւ են աշխատել հանրակրթական դպրոցներում»։ Մայիսի 12-ին ստացել եմ ԿԳՄՍ նախարարի տեղակալ Արաքսիա Սվաջյանի ստորագրությամբ պատասխան․ «Հաշվի առնելով կամավոր ատեստավորման միջոցով ուսուցչի մասնագիտական աճին նպաստելու գործընթացի կարեւորությունը՝ ՀՀ ԿԳՄՍ նախարարությունը նախատեսել էր 2026 թ. ապրիլի 25-ին շուրջ 200 ուսուցչի համար կազմակերպել կամավոր ատեստավորման լրացուցիչ փուլ, որոնք երկու անգամ (2024 եւ 2025 թթ.) չեն հաղթահարել կամավոր ատեստավորումը կամ ՀՀ կառավարության 2022 թ. ապրիլի 28-ի N 596-Ն որոշմամբ հաստատված կարգի պահանջի համաձայն՝ վերաատեստավորման արդյունքում 50-59 տոկոս արդյունք չեն ցուցաբերել կամ նախորդ ատեստավորման ամենաբարձր արդյունքի նկատմամբ 15 տոկոսային կետ աճ չեն ապահովել եւ զրկվում են տվյալ առարկայի դասավանդման իրավունքից, իսկ միայն տվյալ առարկան դասավանդելու դեպքում ենթակա են ազատման: Կամավոր ատեստավորման լրացուցիչ փուլի բողոքարկման արդյունքներն ուսումնասիրելուց եւ վերլուծելուց հետո միայն հնարավոր կլինի տրամադրել ատեստավորման ամփոփված արդյունքների վերաբերյալ վերջնական տեղեկատվություն»:

Ապրիլի 26-ից մինչեւ մայիսի 12-ը 17 օր է, այդքան ժամանակում հնարավոր չէ՞ր ամփոփել լրացուցիչ փուլի բողոքարկման արդյունքները։ Կարելի էր արդյունքները հայտնել՝ հավելելով, որ այսքան ուսուցիչ բողոքարկել է լրացուցիչ փուլի արդյունքները։ Իսկ գուցե իշխանությունը խուսափո՞ւմ է մինչեւ ընտրությունները դուրս մնացող ուսուցիչների ցանկը հրապարակելուց, որ ձայներ չկորցնի: