Վրաստանում իշխանությունները լրջորեն մտահոգված են

Thu, 21 May 2026 18:00:28 +0400

Վրաստանի իշխանությունները լրջորեն մտահոգված են Եվրամիությունում դեմոկրատիայի ռեգրեսով։ Վրաստանի վարչապետ Իրակլի Կոբախիձեն բաց նամակ է ուղարկել Բրյուսել՝ ԵՄ ղեկավարությանը։ Հասցեատերերի ցանկում են Ուրսուլա ֆոն դեր Լեյենը, Ռոբերտա Մեցոլան, Անտոնիու Կոշտան եւ այլոք։ Ինչն է ստիպել, որ վարչապետ Կոբախիձեին նման նախաձեռնությամբ հանդես գալ։ Թերեւս Դանիայում տեղի ունեցած իրադարձությունները։ Ինչպես գրում է քաղաքագետ Սերգեյ Մարկեդոնովը, մի քանի օր առաջ Կոպենհագենում պաղեստինամետ ակտիվիստները փակել էին տրանսպորտային լոգիստիկ «Maersk» ընկերության մուտքը։ Նրանց պայքարի իմաստը պարզ էր։

Նրանք դեմ են, որ բեռնափոխադրումներ իրականացվի դեպի Իսրայել, քանի որ կարծում են, որ լոգիստիկան ԵՄ երկրների հետ ունեն ռազմական նշանակություն։ Ի պատասխան՝ դանիացի ոստիկանները ուժ են կիրառել։ Արդյունքում՝ պաղեստինամետ ցուցարարները դուրս են հանվել ընկերության տարածքից։Վարչապետ Կոբախիձեն հռետորական հարց է ուղղում իր բաց նամակի հասցվատեր՝ ԵՄ ղեկավարներին, թե ինչ վերաբերմունք ունեն Կոպենհագենում տեղի ունեցածի վերաբերյալ։ Եւ եզրակացությունը մեկն է՝ ավաղ Եվրոպան դեմոկրատիայի էտալոն չի հանդիսանում։ Ընդհակառակը, ակնառու է դեմոկրատիայից Եվրոպայի ռեգրեսը։ Նամակը հասկանալի է, որ ավելի շատ քարոզչական նպատակներով է գրվել ու հրապարակվել։

Ասել, թե Բրյուսելը այդ նամակից հետո վերաբերմունքը կփոխի Վրաստանի հանդեպ, սխալ կլիներ։ Չենք կարծում նաեւ, թե Կոբախիձեն էլ նման հույսեր ունի։ Նա այդքան միամիտ մարդ չէ։ Նամակի տողերի արանքում, ինչպես գրում է Մարկեդոնովը, Կոբախիձեն խոսում է վրացական ներքին լսարանի հետ։ Ընդ որում, վրացական ներքին լսարանը նրա համար շատ ավելի կարեւոր են, քան օրինակ Ուրսուլան կամ Ռոբերտան։ Կոբախիձեն ուզում է ասել, որ Եվրամիությունն այնքան էլ միամիտ չէ։ Եւ նախքան Վրաստանի աչքի փուշը տեսնելը, ճիշտ կլիներ, որ նախ Բրյուսելը սեփական աչքի գերանները տեսներ։ Ու կարծես թե դա Կոբախիձեի մոտ ստացվում է։ Գոնե ներքին լսարանը նրան ընկալում է։