Չեմ ուզում, ընդհանրապես, այս մարդու անունը լսել

Fri, 05 Jun 2026 21:35:36 +0400

«Հանրապետություն» կուսակցության նախագահ, քաղաքական թիմի նախընտրական ցուցակի առաջին համար Արամ Սարգսյանը դիմել է Կենտրոնական ընտրական հանձնաժողով «Ուժեղ Հայաստան» կուսակցությունների դաշինքի ընտրացուցակի գրանցումն ուժը կորցրած ճանաչելու պահանջով:

Հիշեցնենք, որ երեկ Հ1-ից եթերում Արամ Սարգսյանի շեֆը` Նիկոլ Փաշինյանը բացահայտ հրահանգ իջեցրեց իր «խոնարհ ծառա» Զավենիչի վրա, որպեսզի վերջինս դիմում ներկայացնի ԿԸՀ, «Ուժեղ Հայաստան» կուսակցության գրանցումը կասեցվի:

Արամ Սարգսյանի նախկին թիմակից Երևանի նախկին քաղաքապետ Ալբերտ Բազեյանը «Հրապարակի» հետ զրույցում խոսելով իր նախկին թիմակից Արամի և Սամվել Կարապետյանի ղեկավարած ուժի դեմ նրա սկսած արշավի մասին, ասաց. «Ցավում եմ կատարվածի համար, ես 20 տարի է այդ մարդու հետ շփում չունեմ, միայն տարվա մեջ երկու անգամ Եռաբլուրում հանդիպում ենք իրար, բարևում ու վերջ, իսկ բարևն Աստծունն է: Վազգենի եղբայրն է, չեմ ուզում սրանից ավելի խոսել այդ մարդու մասին ու չեմ ուզում, ընդհանրապես, այս մարդու անունը լսել:

Ես Վազգենի զինակից ընկերն եմ, Վազգենը ուրիշ տեսակ էր: Ինչ վերաբերում է Սամվել Կարապետյանին, ապա նրան չեն կարողանալու զրկել ընտրություններին մասնակցելու հնարավորությունից, քանի որ նախ նա չկա ցուցակում, և հետո իր թիմը վստահաբար երկու օրից վերցնելու է մեծամասնությունը և ձևավորելու է Կառավարություն: Դրանից հետո նոր Կարապետյանը վստահաբար դուրս է գալու ՌԴ և Կիպրոսի քաղաքացիությունից և դառնալու է Հայաստանի վարչապետը: Նիկոլը պարտված է արդեն: Նա այս տարիներին այնքան վնաս տվեց մեր ժողովրդին, որ էլ տեղ չկա նրան հանդուրժելու: Եթե անգամ նա կեղծիքներով ընտրվեց, հեղափոխություն է լինելու, և Նիկոլը հեռանալու է»: