Ադրբեջանում վախենում են՝ ՀՀ ընտրությունները չեղարկվեն

Fri, 19 Jun 2026 23:15:11 +0400

Ադրբեջանական Haqqin.az-ը խիստ մտահոգված է Հայաստանում հունիսի 7-ին կայացած ընտրությունների արդյունքներից: Ու թեև ընտրություններից արդեն երկու շաբաթ է անցել, Ալիևի օրակարգը սպասարկող լրատվամիջոցը չի դադարում մտահոգություն հայտնել այն առիթով, որ Հայաստանում ընտրությունների արդյունքները կարող են չեղյալ համարվել: Չնայած այն բանի, որ Վահագն Հովակիմյանի ղեկավարած ԿԸՀ-ն արեց ամեն հնարավոր բան, որպեսզի ՔՊ-ն առաջին տեղում հայտնվի, և անգամ ԲՀԿ-ի 60 հազար քվեն գողացավ, միևնույն է Haqqin.az-ը խիստ մտահոգ է:

Ադրբեջանական կայքը գրում է. «Հայաստանի մի քանի քաղաքական ուժեր դիմումներ են ներկայացրել Սահմանադրական դատարան՝ պահանջելով չեղյալ համարել հունիսի 7-ին կայացած խորհրդարանական ընտրությունների արդյունքները: «Մենք խնդրում ենք Սահմանադրական դատարանին անվավեր ճանաչել ընտրությունների արդյունքները, քանի որ մենք խորը մտահոգություններ և կասկածներ ունենք այս ընտրությունների արդյունքում ձևավորված իշխանությունների լեգիտիմության վերաբերյալ»», – լրագրողներին ասել է «Նոր ուժ» կուսակցության ներկայացուցիչ Հակոբ Կարապետյանը։ «Նմանատիպ հայտարարություններ են ներկայացրել նաև Հայաստանի հինգ քաղաքական ուժեր։ Բացի Երևանի նախկին քաղաքապետ Հայկ Մարությանի «Նոր ուժ»-ից, նման գանգատ են ներկայացրել նաև Սամվել Կարապետյանի «Ուժեղ Հայաստան»-ը և նախկին նախագահ Ռոբերտ Քոչարյանի «Հայաստան»-ը, ինչպես նաև գործարար Գարիկ Ծառուկյանի «Բարգավաճ Հայաստան» կուսակցությունը և նախկին օմբուդսմեն Արման Թաթոյանի «Միասնության թևեր»-ը։ Հունիսի 7-ին Հայաստանում կայացած ընտրություններին մասնակցել է ընդհանուր առմամբ 18 քաղաքական ուժ»:

Կայքը գրում է, որ եթե ընդդիմադիր ուժերը հաջողության հասնեն, ապա նրանց ռևանշիստական գաղափարները կազդեն «խաղաղության» օրակարգի վրա: