Առաջին ջութակը Փաշինյանն է, նրան օգնում է Ալիեւը

Wed, 01 Jul 2026 20:15:04 +0400

Եվրոպական հանձնաժողովի նախագահ Ուրսուլա ֆոն դեր Լայենը հուլիսի 2–ին աշխատանքային այցով կժամանի Հայաստան: Նա Երեւան կայցելի Բաքվից։ Փաշինյանի աշխատակազմից տեղեկացնում են, որ Եվրոպական հանձնաժողովի նախագահը Փաշինյանի հետ հանդիպումից հետո հանդես կգա հայտարարություններով և կպատասխանի ԶԼՄ ներկայացուցիչների հարցերին։

Քաղաքագետ Բենիամին Մաթևոսյանը «Հրապարակի» հետ զրույցում, անդրադառնալով Ուրսուլա ֆոն դեր Լայենի այցին, ասում է. «Ես միանշանակ համաձայն եմ «Հրապարակում» լույս տեսած այն նյութի հետ, որի համաձայն` Ուրսուլա ֆոն դեր Լայենի այցից հետո ռուսական կողմը նախատեսում է սանկցիաների նոր փաթեթ կիրառել Հայաստանի դեմ: Ինչ վերաբերում է Ուրսուլա ֆոն դեր Լայենի այցին, ապա ազդակներն այն մասին են, որ այս այցը յուրահատուկ է, քանի որ Նիկոլ Փաշինյանին աջակցություն ցուցաբերելու համար է, նրանք, պայմանական ասած, ուզում են այնպես ցույց տալ, որ Փաշինյանին ՌԴ իշխանությունները նեղում են, իսկ իրենք եկել են Փաշինյանին փրկելու, սակայն մենք պետք է մի բան հստակ ընկալենք, Եվրոպայի համար չկա առանձին Հայաստան, մեզ դիտարկում են որպես մեկ ընդհանուր տարածաշրջան, որտեղ կա նաև Ադրբեջանը: Մեծ հաշվով Հայաստանն ու Ադրբեջանը նրանք նույնականացնում են, և մեզ նույն տրամաբանության մեջ են դիտարկում: Փորձում են Հայաստանի և Ադրբեջանի ղեկավարներին ազդակներ հղել, որպեսզի Ադրբեջանն ու Հայաստանը ՌԴ-ին տարածաշրջանից դուրս մղեն, սակայն այստեղ առաջին «ջութակահարը» Նիկոլ Փաշինյանն է, բայց նրան խորքային կերպով Ալիևն է աջակցում»: