Ռազմիկ Եփրեմյանը հաղթեց ադրբեջանցուն և դուրս եկավ Մ-20 ԵԱ-ի եզրափակիչ

Sat, 11 Jul 2026 22:15:36 +0400

Սկոպյեում ընթացող ազատ ոճի ըմբշամարտի Եվրոպայի Մ-20 առաջնությունում Հայաստանի ներկայացուցիչներն աչքի են ընկնում տպավորիչ ելույթներով: Հայաստանի հավաքականի անդամ, 86 կգ քաշային Ռազմիկ Եփրեմյանը նվաճել է մրցաշարի եզրափակչի ուղեգիր, գրում է armsport.am-ը։

Կիսաեզրափակչում հայ ըմբիշի մրցակիցը Ադրբեջանը ներկայացնող Մուհամեդ Աբասզադեն էր։ Լարված ու համառ պայքարում գոտեմարտի հաշիվը հավասարվեց՝ 1-1, սակայն լրացուցիչ ցուցանիշների առավելությամբ հաղթանակը շնորհվեց մեր մարզիկին:

Հատկանշական է, որ մինչև կիսաեզրափակիչ հասնելը Եփրեմյանը գորգում պարզապես անկասելի էր՝ մրցակիցներին չզիջելով ոչ մի միավոր։

1/8 եզրափակչում նա 10-0 հաշվով վստահորեն հաղթել էր իսրայելցի Տոմեր Դրոժնյակին, իսկ քառորդ եզրափակչում 11-0 հաշվով ջախջախել էր Էստոնիայի ներկայացուցիչ Նիկոլայ Տարասովին։

Ոսկե մեդալի համար վճռորոշ գոտեմարտում Եփրեմյանը վաղը կչափի ուժերը Ռուսաստանը ներկայացնող Իսմայիլ Խանիևի հետ։

Այսօր մրցաշարում փայլուն է հանդես գալիս նաև Հայաստանի մեկ այլ ներկայացուցիչ՝ 65 կգ քաշային Արեն Հայրապետյանը։

Նա ևս հաջողությամբ հաղթահարել է բոլոր արգելքներն ու նվաճել եզրափակչի ուղեգիր, որտեղ չեմպիոնի կոչման համար կգոտեմարտի Մոլդովայի ներկայացուցչի հետ։