Ի՞նչ էր երեկ իրականում կատարվել Գյումրու Սայաթ-Նովա փողոցում

Thu, 16 Jul 2026 11:58:17 +0400

Երեկ համացանցում տեղեկություն էր տարածվել, թե Գյումրու Սայաթ-Նովա փողոցում ծեծկռտուք և զանգվածային անկարգություն է տեղի ունեցել, ինչպես նաև դանակահարություն, ինչի հետևանքով երթևեկությունը կաթվածահար է եղել, իսկ տարածքում հարյուրավոր մարդիկ են հավաքվել։

Սակայն «Հրապարակի» տեղեկություններով՝ իրականում նման միջադեպ չի եղել։ Պարզվել է, որ ամեն ինչ սկսվել է երկու ավտոմեքենաների վարորդների միջև ծագած վիճաբանությունից, որը կապված է եղել միմյանց ճանապարհը խոչընդոտելու հետ։
Միջադեպի ընթացքում վարորդների պատճառով խոչընդոտվել է նաև կանչի մեկնող շտապօգնության մեքենայի երթևեկությունը, ինչն ավելի է լարել իրավիճակը։ Աղմուկի պատճառով դեպքի վայրում արագ հավաքվել են քաղաքացիներ, հարակից օբյեկտների աշխատակիցներ, ինչպես նաև ոստիկանության ծառայողներ։

Հաշվի առնելով, որ Սայաթ-Նովա փողոցը քաղաքի ամենամարդաշատ հատվածներից է, որտեղ գործում են բազմաթիվ խանութներ, սրճարաններ և ռեստորաններ, կարճ ժամանակում մեծ բազմություն է կուտակվել, ինչի հետևանքով էլ ստեղծվել է խցանում։ Սակայն զանգվածային ծեծկռտուք կամ այլ լուրջ միջադեպ, ինչպես տարածվել էր համացանցում, տեղի չի ունեցել։

Կումայրիի ոստիկանության բաժնից փոխանցեցին, որ դեպքի առնչությամբ այս պահին բերման ենթարկվածներ չկան։