Մեդվեդևը հերքում է՝ զորահավաք չի լինի
Wed, 29 Jul 2026 09:30:07 +0400
Ռուսաստանի Անվտանգության խորհրդի փոխնախագահ Դմիտրի Մեդվեդևը հայտարարել է, որ Ռուսաստանում այս աշնանը հնարավոր զորահավաքի մասին լուրերը չեն համապատասխանում իրականությանը։
Ինտերֆաքս-ի փոխանցմամբ՝ Մեդվեդևը հայտարարել է, որ մոտ 200,000 մարդ պայմանագիր է կնքել 2026 թվականի առաջին վեց ամիսների համար։
Անցյալ ամռանը նա հայտնել է, որ 2025 թվականի հունվարից մինչև հուլիսի սկիզբը պայմանագիր է կնքել ավելի քան 210,000 մարդ։
Մեդվեդևը նաև հերքել է զորահավաքի հնարավոր նոր ալիքի մասին հաղորդագրությունները։ Նա ասել է, որ նման հայտարարությունները իրականության հետ որևէ կապ չունեն և տեղեկատվական արշավի մաս են կազմում։ «Թշնամու փորձերը՝ տարածել անհեթեթություններ երկրում նախապատրաստվող զորահավաքի մասին ոչ այլ ինչ են, քան կեղծ սադրանք։ Սա ընտրություններից առաջ քարոզչական արշավի մի մասն է։ Նրանք, բնականաբար, փորձում են անկայունացնել իրավիճակը մեր երկրում և ստեղծել բացասական տրամադրություններ», – ընդգծել է Մեդվեդևը։
Ռուսաստանում նոր զորահավաքի մասին լուրերը շրջանառվում են մի քանի ամիս։ Պատերազմի ուսումնասիրության ամերիկյան ինստիտուտի (ISW) վերլուծաբանները գրել են նման սցենարի հնարավորության մասին։ Եվրոպացի պաշտոնյաները նույնպես չեն բացառել Ռուսաստանում զորահավաքը։