Ու՞ր է 57 քառ. կմ-ն
Tue, 11 Aug 2026 12:59:26 +0400
ԱԺ Պետական-իրավական հարցերի մշտական հանձնաժողովի նախագահի պաշտոնում Արուսյակ Ջուլհակյանի թեկնածության քննարկման ընթացքում «Հայաստան» խմբակցության պատգամավոր Արթուր Խաչատրյանն անդրադարձել է Հայաստանի Հանրապետության տարածքի վերաբերյալ պաշտոնական թվերի տարբերությանը։
Պատգամավորը նշել է, որ տարիներ շարունակ քննարկվում է Հայաստանի սահմանների և տարածքի ճշգրիտ չափի հարցը։ Նրա խոսքով՝ 1979 և 1980 թվականներին հրապարակված խորհրդային հանրագիտարաններում Հայաստանի տարածքը ներկայացված է 29 800 քառակուսի կիլոմետր։
Խաչատրյանը հետաքրքրվել է, թե երբ է շրջանառության մեջ հայտնվել Հայաստանի տարածքի 29 743 քառակուսի կիլոմետր ցուցանիշը՝ ընդգծելով, որ երկու թվերի միջև կա 57 քառակուսի կիլոմետր տարբերություն։
Արուսյակ Ջուլհակյանը պատասխանել է, որ այդ փոփոխության կոնկրետ ամսաթիվը նշել չի կարող։ Միաժամանակ նա նշել է, որ անկախ Հայաստանի դասագրքերում արդեն իսկ օգտագործվում է 29 743 քառակուսի կիլոմետր ցուցանիշը։