«Նոայի» համար ամեն ինչ կորոշվի այսօր

Thu, 13 Aug 2026 20:14:15 +0400

ՈւԵՖԱ-ի Կոնֆերենցիաների լիգայի որակավորման երրորդ փուլում «Նոան» այսօր պատասխան հանդիպումը կանցկացնի շվեյցարական «Տուրբիյոն» մարզադաշտում՝ մրցելով «Սյոնի» հետ։ Թիմերի միջև առաջին խաղն ավարտվել էր գոլառատ ոչ-ոքիով՝ 2:2 հաշվով։

Հանդիպումից առաջ կայացած մամուլի ասուլիսում «Նոայի» գլխավոր մարզիչ Սանդրո Պերկովիչը նշել է, որ թիմը մանրամասն ուսումնասիրել է մրցակցին և լիովին գիտակցում է առաջիկա խաղի կարևորությունը։

Խորվաթ մասնագետի խոսքով՝ «Սյոնի» մասին քննարկումները ֆուտբոլիստների վրա լրացուցիչ ճնշում չեն գործադրում։ Թիմը պատկերացնում է շվեյցարական ակումբի ինչպես ուժեղ, այնպես էլ թույլ կողմերը և պատրաստվում է խաղին՝ նախապես կատարված վերլուծության հիման վրա։

Պերկովիչը նաև ընդգծել է, որ նման մակարդակի հանդիպումներում ֆուտբոլիստներին լրացուցիչ մոտիվացիա պետք չէ։ Եվրոպական մրցաշարի կարևոր խաղը, լուրջ մրցակիցը և հաջորդ փուլ դուրս գալու հնարավորությունն արդեն իսկ բավարար խթան են թիմի համար։

«Նոայի» մարզիչը նշել է, որ նախապատրաստական փուլը հաջող է անցել, թեև առաջիկա խաղում թիմը չի կարողանա օգտագործել մի քանի կարևոր ֆուտբոլիստների։ Այնուամենայնիվ, «Շիրակի» դեմ հանդիպումից հետո ունեցած ժամանակահատվածը թիմն ամբողջությամբ օգտագործել է «Սյոնի» ուսումնասիրության և պատասխան խաղին պատրաստվելու համար։

Պերկովիչը գոհ է նաև վերջին հանդիպումներում թիմի ցուցադրած արդյունավետությունից։ «Նոան» վերջին խաղերում աչքի է ընկել գոլառատ ֆուտբոլով՝ չորս գոլ խփելով «Շիրակին», երկուական՝ «Սյոնին» և «Զիմբրուին», ինչպես նաև երեք անգամ գրավելով «Սյունիքի» դարպասը։

Մարզիչը շեշտել է, որ շվեյցարական թիմի դեմ խաղում իր հիմնական ակնկալիքը ֆուտբոլիստների համարձակ և նվիրված խաղն է։ Նրա խոսքով՝ կարևոր է ցույց տալ, որ «Նոան» կարող է մրցունակ լինել եվրոպական այս մակարդակում և ամբողջ հանդիպման ընթացքում պայքարել հաղթանակի համար։

«Սյոն»–«Նոա» հանդիպումը, նշենք, կմեկնարկի Երևանի ժամանակով 22:15-ին։