Forbes-ի գլխավոր խմբագիրը հեռացվել է պաշտոնից
Fri, 14 Aug 2026 18:00:37 +0400
Forbes հեղինակավոր պարբերականի գլխավոր խմբագիր Ռենդալ Լեյնը հեռացվել է զբաղեցրած պաշտոնից։ Պատճառը Shook Research-ի հիմնադիր Էր-Ջեյ Շուկից 6 միլիոն դոլար ստանալն է։ Այս մասին հայտնում է The New York Times պարբերականը։ Ըստ հոդվածի, Shook Research-ը մի քանի տարի աշխատել է Forbes-ի հետ՝ կապիտալի կառավարման մասնագետների վարկանիշային բնույթի նյութերի պատրաստման ուղղությամբ։ Պարզվել է, որ Շուկը վերոնշյալ գումարը Լեյնին փոխանցել է իր անձնական հաշվից։ Այս ամենը բացահայտվել է այն բանից հետո, երբ փոխվել է Shook Research-ի ղեկավարը։
Ընկերության բաժնետոմսերի վերահսկիչ փաթեթը ձեռք է բերել PPC Enterprises ներդրումային ընկերությունը։ Գնումից հետո էլ նկատվել է գումարի փոխանցման գործարքը եւ այդ մասին հաղորդվել է Forbes-ի ղեկավարությանը։ Լեյնը հաստատել է, որ ստացել է գումարը եւ հրաժարականի դիմում գրել։ Նրա պարտականությունները ժամանակավորապես կկատարի Քերի Լոուերմանը։ Հիշեցնենք, որ Լեյնը Forbes-ում աշխատել է 15 տարի եւ մի շարք հաջողված նախագծեր է թողարկել։