Եւրոպան շարունակում է խաբել հայ ժողովրդին

Tue, 25 Aug 2026 20:00:35 +0400

«Այսօր Հայաստանն առավել քան երբևէ մոտ է Եվրամիությանը», երեքշաբթի՝ օգոստոսի 25-ին, Բրյուսելում կայացած ճեպազրույցի ժամանակ հայտարարել է Եվրահանձնաժողովի պաշտոնական ներկայացուցիչ Մարկուս Լամերտը։

Այսպես է նա մեկնաբանել ՀՀ վարչապետ Նիկոլ Փաշինյանի երեկ ԱԺ-ում արված այն հայտարարությունը, թե Երևանը շուտով ակնկալում է սկսել ԵՄ անդամակցության համար պաշտոնապես դիմումի գործընթացը, փոխանցում է Deutsche Welle-ն։

Խոսելով մերձեցման մասին՝ Մարկուս Լամերտը հիշեցրել է մայիսին կայացած ԵՄ-ՀՀ առաջին գագաթնաժողովը, ինչպես նաև համագործակցությունը «Դիմակայունության և աճի ծրագրի» և «Եվրոպական խաղաղության հիմնադրամի» շրջանակներում։

Ավելին, ըստ Եվրահանձնաժողովի խոսնակի, Հայաստանն արդեն իսկ «առաջին քայլն է արել դեպի ԵՄ»՝ ընդունելով օրենք եվրոպական ինտեգրման գործընթացի մեկնարկի մասին։ Լամերտը այս քայլը անվանել է «կարևոր խորհրդանշական ազդանշան»։

Միևնույն ժամանակ, Եվրահանձնաժողովում վերահաստատել են, որ ԵՄ անդամակցությունը տեղի է ունենում «արժանիքների վրա հիմնված հստակ սահմանված գործընթացի շրջանակում»։ Լամերտի խոսքով՝ այս գործընթացը սկսվում է երկրի անդամակցության պաշտոնական դիմումից։

Նա շեշտել է, որ Բրյուսելն արդեն իսկ աշխատում է Հայաստանի հետ հետագա մերձեցման ուղղությամբ, մասնավորապես՝ տրանսպորտային կապերի, առևտրի և համագործակցության այլ ոլորտներում։