«Հրապարակ»․ Սկսվեց քվե մուրալու արշավը

Sat, 05 Sep 2026 08:05:07 +0400

Հոկտեմբերի 25-ին Իջեւան խոշորացված համայնքում ՏԻՄ ընտրություններ կլինեն: Մենք գրել էինք, որ գործող ՔՊ-ական քաղաքապետ Արթուր Ճաղարյանը հինգ տարի շարունակ ոչինչ չի արել, իսկ այժմ, թեւքերը քշտած, գործի է անցել․ շենքեր է վերանորոգում, վերելակներ փոխում եւ այլն:

Սա արդեն ՔՊ-ական ձեռագիր է` մարդկանց կարճ հիշողության վրա հույս դնելով, ընտրություններից առաջ մի քանի ամիս պետական միջոցներից «ընտրակաշառք» բաժանել` խաբել ընտրողին ու նրա քվեները ստանալ: Մեզ պատմեցին, որ քաղաքապետ Ճաղարյանը որոշել է նաեւ Իջեւանի արտաքին տեսքը կարգի բերել․ քաղաքապետարանի աշխատակիցներին հրահանգել է առգրավել փողոցում պտուղ-բանջարեղեն վաճառողների ապրանքը, իբր դա ապօրինի է, հակասանիտարական եւ այլն: Մեզ պատմեցին, որ բավականին շատ ապրանք են առգրավել: