3-րդ տարին անընդմեջ տապալված դասագրքեր և էլեկտրոնային անորոշություն

Wed, 09 Sep 2026 14:45:30 +0400

​«Հրապարակ»-ի զրուցակիցն է կրթության փորձագետ Վանո Կարապետյանը։

– Ինչպե՞ս եք գնահատում նոր ուսումնական տարվա մեկնարկը դպրոցներում։

​- Այս ուսումնական տարին, ցավոք, մեկնարկել է ինչպես նախկինից եկող, այնպես էլ նոր կազմակերպչական ու բովանդակային խնդիրներով։​Տարվա մեկնարկից ընդամենը երկու օր առաջ նախկին ԴԿՏՀ համակարգը փակվել է, և դպրոցներին փաստացի կանգնեցրել են անորոշության առջև։ Նոր՝ my.emis.am հարթակին անցումը կատարվում է առանց ադապտացիոն ժամանակ տրամադրելու, ինչը լրացուցիչ քաոս է ստեղծում վարչակազմի ու ուսուցիչների համար:

​- Ինչո՞վ է նոր համակարգը բարդացնում դպրոցների աշխատանքը:

​- Նախկինում դպրոցների կառավարման տեղեկատվական համակարգում (ԴԿՏՀ) ամեն դպրոց ուներ իր հստակ, ամբողջական էջը։ Այժմ վարչակազմը ստիպված է նորից, զրոյից մուտքագրել հսկայական ծավալի տվյալներ։ Քանի որ նոր համակարգի մոդուլները դեռևս վերջնական հղկված ու իրար հետ ինտեգրված չեն, առաջանում են լուրջ անհամապատասխանություններ դասաբաշխման, ուսպլանի ու դասացուցակի միջև։

​- Ինչպե՞ս է սա ազդում դպրոցների ղեկավարության և դասապրոցեսի վրա:

​- Փոխանակ տարվա սկզբում տնօրեններն ու փոխտնօրենները զբաղվեն կրթական գործընթացի կազմակերպմամբ, օրերով փորձում են հասկանալ նոր հարթակի տրամաբանությունը, կապ հաստատել ԿՏԱԿ-ի հետ և ուղղել տեխնիկական սխալները։ Արդյունքում, ուսումնական տարվա առաջին օրերին դպրոցներում ստեղծվել է անհարկի լարվածություն ու կառավարչական քաոս, որը էականորեն ազդում է դասապրոցեսի բնականոն մեկնարկի վրա։

– Ի՞նչ իրավիճակ է դասագրքերի ապահովման հարցում:

​- Դասագրքերի հարցը նույնպես համակարգային լուրջ բացթողում է․ նախարարությունն արդեն 3-րդ տարին անընդմեջ տապալում է դասագրքաստեղծման գործընթացը, ինչի պատճառով նոր առարկաներ մտցվում են դպրոց՝ առանց բազային ուսումնական նյութի։
Օրինակ, ​«Առողջ ապրելակերպ» առարկան նախկինում պարտադիր խմբակ էր և չուներ դասագիրք (միայն ուսուցչի ձեռնարկ էր)։ Հիմա այն դարձրել են պարտադիր առարկա, բայց դարձյալ առանց դասագրքի։ 21-րդ դարում դասագիրքը գիտելիքի ամենահավաստի ու փորձաքննված աղբյուրն է։ Առանց դրա՝ ամեն ուսուցիչ նյութը մատուցելու է յուրովի, ինչը խաթարելու է կրթության միասնական մակարդակն ու խորացնելու անհամաչափությունը դպրոցների միջև։
Իսկ «Անվտանգ կենսագործունեություն» առարկայի համար դասագրքի փոխարեն աշակերտներին առաջարկվում են միայն վճարովի աշխատանքային տետրեր, իսկ ուսուցիչներին՝ մեթոդական ձեռնարկներ։

​- Ի՞նչ լուծումներ են առաջարկվում ուսուցիչներին ստեղծված իրավիճակում:

​- Վերապատրաստումների ժամանակ ուսուցիչներին բանավոր ակնարկում են առարկայի դասավանդումը թողնել 2-րդ կիսամյակին՝ հույսով, թե մինչ այդ դասագիրք կունենան։ Սա ուղղակի վկայում է պլանավորման բացակայության մասին․ փոխանակ նախորդ տարիների սխալներից դասեր քաղելու, նախարարությունը կրկին դասապրոցեսը սկսում է ֆորսմաժորային ռեժիմով։