Ալիևը երազում էր այդ մասին

Mon, 14 Sep 2026 11:35:01 +0400

ԱԺ «Հայաստան» խմբակցության պատգամավոր Մեսրոպ Մանուկյանը Ռոբերտ Քոչարյանի կալանավորման վերաբերյալ կոշտ գնահատականներ է հնչեցրել՝ պնդելով, որ տեղի ունեցածի գլխավոր շահառուն Ադրբեջանի նախագահ Իլհամ Ալիևն է։

Ասուլիսի ընթացքում ընդդիմադիր պատգամավորը հայտարարել է, որ Քոչարյանի կալանավորումը համապատասխանում է Ալիևի վաղեմի ցանկությանը՝ Արցախի նախկին ղեկավարների նկատմամբ նման իրավիճակ տեսնելու առումով։

«Ռոբերտ Քոչարյանի կալանավորման առաջին շահառուն և երջանիկն Ալիևն է, որովհետև ինքը երազում էր, որ Արցախի Հանրապետության բոլոր նախագահները լինեն կալանքի տակ», — ասել է Մանուկյանը։

Նրա խոսքով՝ իշխանության կողմից իրականացվող տարբեր քաղաքական գործընթացները՝ այդ թվում Եվրոպական միության հետ կապված օրակարգը, Սահմանադրության փոփոխության հարցը և Հայ Առաքելական Եկեղեցու դեմ տարվող քաղաքականությունը, իրարից անկախ չեն։

Մանուկյանի գնահատմամբ՝ իշխանությունը իշխանությունը պահպանելու համար պատրաստ է թուլացնել կամ չեզոքացնել իրեն վտանգ ներկայացնող տարբեր կենտրոններ և քաղաքական օջախներ։

«Նիկոլ Փաշինյանը բոլորին ինչ-որ բաներ է խոսք տվել։ Խոսում ենք ԵՄ գնալու, Սահմանադրության փոփոխության մասին, եկեղեցու դեմ կռվի։ Եվ իրենք իշխանությունը պահելու համար պատրաստ են ցանկացած օջախ վերացնել կամ մի ձև այդ օջախներն այս փուլում ապաակտիվացնել», – նշել է պատգամավորը։

Նրա խոսքով՝ ստեղծված իրավիճակում կարող են լինել տարբեր շահագրգիռ կողմեր, սակայն գործողությունների հիմնական պատասխանատուն, իր գնահատմամբ, Հայաստանի իշխանությունն է։

«Ստացվում է՝ պատվիրատուները բազմաթիվ են, կատարողը՝ ուղիղ իշխանությունն է և մի նպատակ ունի, որ իր իշխանությունը մեկ օր ավելի շատ պահի», – հավելել է Մեսրոպ Մանուկյանը։