Դատավորը թույլ չի տալիս տեսանկարահանել Գագիկ Խաչատրյանին
Fri, 18 Sep 2026 16:52:29 +0400
Հակակոռուպցիոն դատարանում դատավոր Վարդգես Ստեփանյանի նախագահությամբ սկսվեց ՊԵԿ նախկին նախագահ Գագիկ Խաչատրյանի գործով դատական նիստը:
Փաստաբան Երեմ Սարգսյանը միջնորդություն ներկայացրեց, որպեսզի ԶԼՄ ներկայացուցիչները հնարավորություն ունենան տեսանկարահանել դատական նիստը և ըստ էության բաց, թափանցիկ ընթացքն ապահովել:
Սակայն դատավորը նշեց, որ այդ հարցին կանդրադառնա նիստի ավարտին, չթույլատրելով լրագրողներին տեսանկարահանում իրականացնել:
Նշենք, որ Երեմ Սարգսյանն իր պաշտպանյալ Գագիկ Խաչատրյանից ևս թույլտվություն ստացավ, ըստ էության` Գագիկ Խաչատրյանը դեմ չէր, որպեսզի նիստը տեսանկարահանվի:
Դատավորի այդ որոշումից հետո Երեմ Սարգսյանը միջնորդեց, որպեսզի դատական նիստը հետաձգվի, նշելով, որ իր պաշտպանյալն այս վիճակում չի կարող մասնակցել նիստին: Այդ միջնորդությունը նույնպես մերժվեց:
Պաշտպանը նշեց, որ դատական նիստին ներկա է նաև Գագիկ Խաչատրյանի բժիշկը և պետք է բուժզննում իրականացնի, քանի որ ավելի վաղ այդ հնարավորությունը չի ունեցել, չեն թույլատրել:
Դատարանը չթույլատրեց նիստի ընթացքում բուժզննում իրականացնել: