Էրդողանի հետ մի՛ կատակեք, վատ ավարտ կլինի․ Թրամփը քծնել է

Wed, 23 Sep 2026 12:30:49 +0400

ԱՄՆ նախագահ Դոնալդ Թրամփը Թուրքիայի նախագահ Ռեջեփ Թայիփ Էրդողանին անվանել է «պինդ ընկույզ» և «ականավոր մարդ»:
Սպիտակ տան ղեկավարը Թուրքիայի առաջնորդի մասին խոսել է նրա և Պարսից ծոցի երկրների առաջնորդների հետ հանդիպման ժամանակ:

«Նրա հետ կատակները վատ են ավարտվում», – ասել է Թրամփը և կոչ արել մերձավորարևելյան քաղաքական գործիչներին չանտեսել Թուրքիայի նախագահին:

Նա նաև Էրդողանին իր ընկերն է անվանել։

«Այստեղ է իմ ընկերը՝ Թուրքիայից։ Նա պինդ ընկույզ է: Նրա հետ կատակները վատ են ավարտվում: Նա կոշտ է: Հուսով եմ, որ դա ճիշտ կթարգմանվի, հուսով եմ, որ մենք լավ թարգմանիչ ունենք: Նա պարզապես զարմանալի տղա է: Նա ֆանտաստիկ է: Ճի՞շտ է, բարեկամս»,- ասել է Թրամփը՝ դիմելով Էրդողանին։