Հռոմի պապի հատուկ դեսպանորդը կրկին Մոսկվա է մեկնում պատերազմի պատճառով

Sun, 27 Sep 2026 13:05:12 +0400

Հռոմի պապ Լևոն XIV-ի հատուկ դեսպանորդ, Իտալիայի եպիսկոպոսների համաժողովի ղեկավար, կարդինալ Մատեո Զուպպին սեպտեմբերի 28-ից 30-ը կայցելի Մոսկվա՝ Ուկրաինայում պատերազմի հետ կապված մարդասիրական հարցեր քննարկելու համար։

Կարդինալի խոսքով՝ իր այցը հաստատել է պապը, ով անձամբ է վերահսկում Ուկրաինայում մարդասիրական առաքելությունը։

«Մեզ համար այս համագործակցությունը կարևոր է, նույնիսկ եթե այն օգնում է միայն մեկ մարդու։ Սա հույսի փոքր նշան է, որ հետևանքները կարող են նվազագույնի հասցվել կամ պատերազմը դադարեցնել։ Սա թույլ է տալիս մեզ ցույց տալ, որ երկխոսությունը հնարավոր է, և որ դրա միջոցով կարելի է լուծումներ գտնել», – ՏԱՍՍ-ին ասել է Զուպպին։

Կարդինալը հույս ունի Մոսկվայում քննարկել երկու կողմերի առջև ծառացած «որոշակի դժվարությունները հաղթահարելու» ուղիները։ Իր առաքելության շրջանակներում Վատիկանի ներկայացուցիչը, մասնավորապես, նպաստում է բանտարկյալների փոխանակմանը և պատերազմական գոտիներից տարհանված երեխաների վերադարձին։ Այդ նպատակով նա կապեր է պահպանում Ռուսաստանի երեխաների իրավունքների և մարդու իրավունքների հանձնակատարների հետ։

Զուպպին նշանակվել է Հռոմի պապ Ֆրանցիսկոսի Ուկրաինայում հատուկ դեսպանորդ 2023 թվականին։ Այս առաքելության շրջանակներում նա այցելել է Կիև և Մոսկվա, ինչպես նաև հանդիպումներ է ունեցել այլ երկրների ներկայացուցիչների հետ։

Այս առաջիկա այցը կլինի կարդինալի երրորդ այցը Մոսկվա։ Վերջին անգամ նա Ռուսաստանի մայրաքաղաք է այցելել 2024 թվականի հոկտեմբերին։