Եթե ոստիկանություն եք զանգում, ուրեմն պիտի սպասեք

Wed, 07 Oct 2026 18:22:36 +0400

ԱԺ-ում կառավարության հետ հարցուպատասխանի ժամանակ «Ուժեղ Հայաստան» խմբակցության պատգամավոր Արեգա Հովսեփյանը Նիկոլ Փաշինյանին հարցրեց՝ արդյոք իշխանությունը պատրաստվում է գնահատական տալ Շաքիում տեղի ունեցած դեպքին և Անի Ավետիսյանի գործողություններին։

Պատգամավորի խոսքով՝ Անի Ավետիսյանը պաշտպանել է իր երեխաներին, պատասխանել ադրբեջանցու կրակոցին և վիրավորել նրան՝ ինքնապաշտպանվելով։

Նա նաև հայտարարեց, որ Փաշինյանն իր վերջին հայտարարություններով փաստացի զբաղվում է ադրբեջանցու պաշտպանությամբ։

Փաշինյանը, պատասխանելով, հայտարարեց, որ եթե նման դեպք տեղի ունենար ընդդիմության իշխանության ժամանակ, հնարավոր էր՝ ավելի լուրջ իրավիճակ ստեղծվեր՝ ընդհուպ մինչև ռազմական դրության հայտարարում և բանակը մարտական պատրաստության բերելը։

Վարչապետը նաև ասաց, որ եթե քաղաքացին ոստիկանություն է զանգահարում, պետք է սպասի ոստիկանների գործողություններին։

«Հասկանում եմ, մայրական բնազդը երբեմն ամեն ինչից շատ ուժեղ է, բայց երբ ոստիկանություն եք զանգում, պետք է սպասել ոստիկանության գործողություններին»,- ասաց Փաշինյանը։

Նրա խոսքով՝ Շաքիի դեպքը քրեական միջադեպ է, և Հայաստանում նման դեպքեր ամեն օր տեղի են ունենում։