Տավուշում անտառ չի մնացել` անտառագողությունը մեծ թափ է ստացել

Tue, 20 Oct 2026 19:15:49 +0400

Երևանի պետական համալսարանի Իջևանի մասնաճյուղի ֆեյսբուքյան էջից տեղեկացանք, որ Տավուշի անտառների պահպանությանն ու կայուն զարգացմանն ուղղված աշխատաժողով է կայացել բուհում: 2026 թ. հոկտեմբերի 17-18-ը ԵՊՀ Իջևանի մասնաճյուղում Ֆրանսիայի հայկական հիմնադրամի և ֆրանսիական «Կինոմե» (Kinomé) կազմակերպության համագործակցությամբ տեղի ունեցան հանդիպում-քննարկում և աշխատաժողով՝ նվիրված Տավուշի անտառների պահպանությանն ու վերականգնմանը, ինչպես նաև բնության պահպանության ոլորտում համագործակցության նոր հնարավորությունների բացահայտմանը։ Հոկտեմբերի 17-ի հանդիպում-քննարկմանը մասնակցել են ԵՊՀ Իջևանի մասնաճյուղի տնօրեն Մ. Օթարյանը, Ֆրանսիայի հայկական հիմնադրամի աշխատակիցները և «Կինոմե» կազմակերպության ներկայացուցիչը։

Հանդիպման ընթացքում քննարկվել են անտառների պահպանության և կայուն զարգացման ուղղությամբ համագործակցության հնարավորությունները և համալսարանի դերը Տավուշի անտառների և բնության պահպանության գործում, ասված է հայտարարության մեջ:

Անխոս այս քննարկումների ժամանակ որևէ խոսք չի ասվում այն մասին, որ Տավուշում, հատկապես` Իջևանում անտառ չի մնացել, հատկապես 2018 թվականից հետո անտառագողությունը մեծ թափ է ստացել, իսկ, օրինակ, Իջևանի անտառնտեսության պետը բնակարան է գնել Երևանում այդ ամենի ֆոնին: Տպավորություն է, որ այս մարդիկ Տավուշի մարզից չեն, և չեն տեսնում, թե իրենց շրջակայքում ինչ է կատարվում, ինչպես են ամեն օր ծառեր հատվում, և նման անիմաստ քննարկումներով չգիտես թե ինչ են ուզում ցույց տալ հանրությանը: