Ջարդուփշուր արեք ամեն ինչ, Նիկոլը տեր է

Wed, 21 Oct 2026 20:15:08 +0400

Ստեփանավանի համայնքապետի թեկնածու Արսեն Գևորգյանին առաջարկում եմ առանց երկար-բարակ մտածելու էլեկտրոնային նամակ գրել Նիկոլ Փաշինյանին և հայտնել, որ իշխանության ներկայացուցիչները ընտրությունների նախօրյակին իրեն ճնշել են, ընդհուպ՝ ձերբակալել: Արսեն ջան, էլ ժամանակ մի կորցրու: Նիկոլը երկու օր առաջ էր հայտարարել՝ ում ճնշեն, թող ինձ նամակ գրի՝ հարցերը կարգավորեմ: Ու կապ չունի որ կուսակցությունից ես առաջադրվել: Նիկոլն ասել էր՝ թող ընդդիմադիր թեկնածուները նամակ գրեն, հիմնավորեն իրենց նկատմամբ ճնշումները, ես կբռնեմ էդ ճնշողներին ու հրապարակավ խայտառակ կանեմ:
Պարոն Փաշինյան, մինչև Արսեն Գևորգյանը կորոշի Ձեզ դիմել և տեղեկացնել իր «պատահական» ձերբակալության մասին, մինչև նրա նամակը Ստեփանավանից հասնի Ձեզ, ահավասիկ հայտնում եմ, որ ձերբակալել են համայնքապետի թեկնածուին և մունդռում են նրա քարոզարշավի վերջին օրերը: Նախատեսված է եզրափակիչ մեծ հանրահավաք, երգ, պար, ամեն ինչ, իսկ միլիցեքը, տեղի ՔՊ-շնիկների հետ խոսքները մեկ արած, ձերբակալել են թեկնածուին: Սա խայտառակություն է, եթե ոչ շանտղություն: Եվ ուրեմն, պարոն Փաշինյան, էդ COP-մոպդ թող ու թռիր Ստեփանավան: Ժողովուրդը Ձեզ է սպասում… Միայն Դուք կարող եք ասֆալտին փռել և պատերին ծեփել այդ ռայոնական սանձարձակ իշխանավորներին, որոնք վաղուց դադարել են ձեր լայվերը դիտել և գրառումները կարդալ:

Պարոն Փաշինյան, նաև ուզում եմ ծանոթության կարգով Ձեզ ասել, որ Ստեփանավանի համայնքապետի ընդդիմադիր թեկնածու Արսեն Գևորգյանը բավականին մեծ ընտրազանգված ունի, որը, եթե դուրս մնաց Արսեն Գևորգյանի վերահսկողությունից, ամեն ինչ կարող է անել տեղի ՔՊ-ի հետ՝ կուզենա շալվարը կհանի, կուզենա՝ մի շալվար էլ վրայից կհագցնի: Պապիկյանին էլ կարգադրեք՝ Ստեփանավանում քիչ երևա, քանզի Արսեն Գևորգյանի կողմնակիցները գրեթե վստահ են, որ նա է Ստեփանավանում տեղի ունեցող բոլոր ապօրինությունների, այդ թվում և ապօրինի ձերբակալությունների հրահրիչը. իսկը՝ տեղական նշանակության «Նիկոլ»:

Պապիկյանին մի բան պատահի՝ մեր սահմաններն անտեր կմնան: Այնպես որ, տեր կանգնիր այդ ինքնաբուխ ընտրակեղծարարին:
Եթե հանկարծ այնպես պատահի, որ Նիկոլ Փաշինյանը դրժի իր խոսքն ու օգնության չհասնի Ստեփանավանի համայնքապետի թեկնածուին և կամ ժողովուրդը հասկանա, որ ՀՀ իշխանությունն իրեն ծաղրուծանակում է՝ ձերբակալելով իր սրտի թեկնածուին, Ստեփանավանը, հնարավոր է դառնա երկրորդ Փարիզ կամ Տիրանա… Այս մասին ևս խոսել է Փաշինյանը՝ առաջարկելով ապստամբություն կամ հեղափոխություն անել, փողոց դուրս գալ: Եվ ուրեմն, սիրելի ստեփանավանցիներ, դուք ազատ եք ձեր գործողություններում: ՔՊ-ին իր թեկնածուով հանդերձ, Ստեփանավանից լարեք: Նրանք սարսափած են առաջիկա ընտրության հնարավոր արդյունքից, չգիտեն ինչ են պատասխանելու Նիկոլին, եթե զբաղեցնեն վերջին տեղը: Հենց այդ պատճառով էլ բռնել են տվել ձեր թեկնածուին, որ խառնակություն գցեն, որ ընտրություն տեղի չունենա: Դուք էլ նամակներով հեղեղեք Նիկոլ Փաշինյանին, պահանջեք, որ նա գա Ստեփանավան և տեղում ծանոթանա իրավիճակին: Հենց զգաք, որ ձեր թեկնածուին միտք չունեն բաց թողնելու, էլ մի սպասեք, ուղիղ՝ փողոց… Նիկոլը տեր է: Դե իսկ հոկտեմբերի 25-ին էլ արդեն գիտեք՝ ինչ պիտի անեք, որ ՔՊ-ի իզն ու թոզը չմնա ձեր համայնքում․․․